CM-in sorkar laipui hotute mau-rua a sawipui
Chief minister Zoramthanga chuan August 22, Ningani khan sorkar laipuia minister-te a dâwr chhunzawm. Finance minister Nirmala Sitharaman, Commerce & Industry minister Piyush Goyal leh NITI Aayog vice chairman Dr Rajiv Kumar te chu raw ṭha chi chìn leh a ṭangkai dan turte a sawipui.
CM Zoramthanga chuan, Mizoram sorkarin hmasawnna chak taka kalpui turin hmachhawp hrang hrang a neihte Nirmala Sitharaman a sawipui a; sorkar laipui aṭanga sum hmuh theihna tura ruahmanna siam dan tur sawipuiin, a ṭul chuan special central assistance pawh mamawh a nih tur thu an sawi.
Zoramthanga chuan, raw ṭha chi hmanga Mizoram leh India hmarchhak bialte economy dinhmun ṭha zawka hlânkai a nih theih a beisei thu sawiin, ruaah project lian tham Mizorama kalpui turin a ngen a; Union Finance Minister chuan, uluk taka lo zir chian a, theihtawp a chhuahpui tur thu a sawi niin sorkar thuchhuah chuan a tarlang.
CM Zoramthanga chuan, Aizawl khawpuia urban development project kal mek chhunzawm dan tur te, sustainable urban transport project kalpuia khawpuia cable car ruahman dan tur te, GBS (Gross Budgetary Support) 10% kalpui zel tura ṭan lak dan tur te, tlangram state-te tan norms hranpa neih a ṭul thu te, comprehensive Mizoram tourism development project kalpui a ṭul thute a sawi bawk.
Chief Minister chuan, Tribal Affairs minister Arjun Munda pawh kâwmin, Mizoram tana thil pawimawh hrang hrang a sawipui a; mau leh rua uar zawka chìn dan tur leh hman ṭangkai dan turte leh thil dang chi hrang hrang a sawi lang a ni.