Mizoramin Poshan Abhiyaan Award a dawng

24th August, 2019

Mizoram sorkar chuan kum 2018-19 atana sorkar laipuia Ministry of Women & Child Development an buatsaih, 'Poshan Abhiyaan Award pahnih a dawng a, award pahnihte hian thuchei leh cheng nuai 250 a keng.

Poshan Award semna inkhawm hi nimin khan New Delhi-a Hotel Ashok-ah buatsaih a ni a; Mizoramin award a dawnte chu Women and Child Development minister Smriti Zubin Irani hnen aṭangin Social Welfare secretary Zoramthangi Hauhnar leh director Vanlalpianpuii ten an dawng a ni.

Thu dawn danin, Poshan Abhiyaan Award-ah hian India rama state leh union territory 36-te mihring cheng zat azirin hlawm li-ah ṭhen an ni a, Mizoram chu group 3-ah a awm. Mizoram hi 'Implementation of ICDS-CAS' ah leh 'Overall Excellence in Implementation' pakhatna a ni ve ve.

Field Level Leadership Awards-ah Champhai district chu Best District Award hlan a ni a, Thingdawl ICDS Project-in Best Block Award a dawng. Champhai Vengthlang Anganwadi Center-3 leh Bualpui Anganwadi Center-3 (Kolasib district) ten Best Anganwadi Worker, Anganwadi Helper, ASHA, ANM & LS (AAAA & LS) Award an dawng a, hei hian Rs. 2,50,000 ve ve an keng a ni.

Poshan Abhiyaan hi March 8, 2018-ah prime minister Narendra Modi-a'n a hawng a, PM-in a hawn ní hian Mizoramah pawh Social Welfare department-in Women & Child Development hnuaiah a hawng ve nghal. Poshan Abhiyaan-in a tum ber chu, naupang ṭhanṭhu (ṭhang chak lo), kum nena khaikhina tâwi lutuk, chaw ṭha hmuh loh vanga cher lutuk, san zawng nena khaikhina zâng lutuk, kum ngaihtuaha zâng lutuk leh nau piang zâng lutukte tihtlem a ni. Nu, nau pai, nau pawm leh hmeichhe tleirawlte'n chaw ṭha an hmuh theih nan leh anaemia (thisen tlakchhamna) laka an fihlimna tura hmalakna a ni bawk.

Social Welfare department chuan, Poshan Abhiyaan chu Mizoramah hman ṭan a nih aṭangin SWD officer leh thawktute'n nasa takin ṭan an la tih sawiin, "Mission-in ti tura a tihte rang tak leh uluk taka thawh a ni ṭhin. District pariata ICDS project 27 enkawltu officer leh staff-te'n a pawimawhna hriain Health department leh line department hrang hrangte nen thawhhona ṭha tak an nei a, hetiang dinhmun hi kan chuangkai ta a. India ram state hrang hrang zingah Mizoram pakhatna a ni hi a lawmawm em em a ni," an ti.