KHAWTHLIR

ZONET OTT Media service 

August 22, Ningani zan khan ZONET online media streaming platform 'Over The Top' media service chu ZONET Cable TV director LV Lathantluanga'n a tlangzarh. OTT media service hmang hian ZONET programme-te chu online-in a en theih dawn a, tv.zonet.in ah a duh tan en theih a ni tawh. Ni 90 chhung chu a thlâwnin a en theih dawn a, ni 90 hnuah erawh chuan a man pek a ngai tawh ang.

Hnahthial Penial Branch YMA chuan nimin khan an hall-ah Lunglei Civil Hospital tan thisen unit 44 an pe a, a petute mipa 30 leh hmeichhia panga an ni. Republic Vengthlang Branch KṬP-in an kohhran hall-ah blood donation camp an huaihawt a, mipa 26 leh hmeichhia palite'n Aizawl Civil Hospital tan thisen unit 30 an pe. Youth Evangelical Fellowship, Kelsih pawhin nimin khan State Referral Hospital-ah thisen unit 23 an pe a, a petute mipa 18 leh hmeichhia panga an ni.

YMA Sub-Headquarters, Serchhip chuan thu­chhuah siamin, kumin fûr ruahtui tla vanga Serchhip Sub-Hqrs. YMA ṭhuthmun leh a awp branch huam chhunga vanduaina tâwkte chhawmdawlna atana vehbûr an khawna thawhlawm thawhtu zawng zawng chungah an lawm thu an tarlang. Sum an hmuh chhuah Rs. 3,00,705 chu vawiin hian sem a nih tur thu an tarlang bawk.

Mizoram Education Inspecting Officers Association (MEIOA) chuan nimin khan Chaltlanga Tourist Lodge-ah General Conference an hmang a, School Education secretary Esther Lalruatkimi'n a hmanpui. MEIOA-ah hian member 41 an awm a, district hrang hrang aṭangin an tel a ni.

August 22-23 chhung khan Lawngtlaiah Electors Verification Programme (EVP) training buatsaih a ni a; Lawngtlai additional district election officer B Lal­chhawntluanga leh official dangte'n political party aiawh, electoral registration officer leh assistant electoral registration officer leh common service centre (CSC)-te EVP chungchang an zirtir. EVP hi September 1, 2019 aṭanga kalpui tur niin, September thla chhung a awh dawn a ni.