CM-in sorkar laipui hotute a kâwm

Chief minister Zoramthanga chuan, Mizoram chu ruihhlo tamna ram, Golden Triangle tia sawi Thailand, Myanmar leh Laos ram hnaiha awm a nih avangin ruihhlo hman sual leh tawlh rûk ven kawngah nasa taka hmalak a ṭul thu a sawi a; ruihhlo ngaite leh ngawlveite enkawlna hmun changtlung tak din tura hmalak mek a nih thu sawiin, chumi atan chuan ṭanpuina awm theite ngaihtuahpui turin Arjun Munda a ngen.

CM Zoramthanga chuan Railways minister leh Commerce & Industry minister Piyush Goyal chu a pisaah a kâwm a, Sairang thlenga rél kawng siam mek a sawipui. Piyush Goyal chuan, rél kawng siam chu zawh thuai a ṭul thu leh harsatna a awm chuan a hnena hriattir thuai ṭhin turin a lo chah.

Zoramthanga hian Zokhawthara Land Custom Station tihchangtlun dan tur, dan loa bungrua tawlh rûk chungchanga Myanmar sorkar nena inbiak dan tur, Kawrpuichhuah leh Zorinpuia Land Custom Station din chungchang, Saisihchhuah, Hnahlan, Vaphai, Farkawn, Thingsai leh hmun ṭhenkhata border trade point hna thawh chhunzawm dan tur leh Act East Policy chungchangte a sawipui bawk.

Chief Minister chuan NITI Aayog vice chairman Dr Rajiv Kumar pawh a pisaah hmuin, Mizoram hmasawnna tur thil chi hrang hrang a sawipui a; rua hmanga Mizoram leh India hmarchhak bial economy nasa taka tihhmasawn a nih theihna atana a hmachhawpte hrilhin, sorkar laipuia department hrang hrangin an puih theihna tura NITI Aayog-in hma a lakpui theih dan tur a sawipui a ni.

Dr Rajiv Kumar chuan, NITI Aayog-in theihtawp an chhuahpui tur thu leh central ministry dangte nena an thawhho theihna tura ruahmana pawh an siam tur thu a lo hrilh niin sorkar thuchhuah chuan a tarlang. CM Zoramthanga'n AAI hotute an pisaa a kawmnaah, Mizorama thlawhna tam zawk thlawhtír chungchang te, khualzin phur mai bakah, bungraw phur chi thlawhna thlawhtir chungchang te, Lengpui Airport tihchangtlun leh helicopter tam zawk thlawhtir chungchangte a sawipui. AAI hotute chuan, a theihna apiangah an lo bawhzui tur thu an lo hrilh niin sorkar thuchhuah chuan a tarlang.

Chief Minister hian nimin khan DoNER minister Jitendra Singh pawh a hmu a, Mizoram hmasawnna chak zawka kalpui tura hmachhawp hrang hrang a sawipui. CM Zoramthanga hi minister of state Robert Romawia Royte, Planning Board vice chairman H Rammawi, chief secretary Lalnunmawia Chuaungo, Planning secretary Dr C Vanlalramsanga, GAD Aviation Wing principal consultant Wg.Cdr. J Lalhmingliana leh official dangte'n an 

ṭawiawm a ni.