Mau/ruaah thil dik lo awm ngeiah an ngai

ZPM Ṭhalai chuan thuchhuah siamin, miretheite khai chhuahna tur leh sorkar flagship programme pawimawh tak tur nia Chief Minister-in a sawi mau/rua chungchangah, a changtu tur ber leh engkim hre ber tura ngaih Horticulture department-in an hre miah lo chu mak an tih thu leh, thil dik lo a awm ngeia an hriat thu an tarlang.

ZPM ṭhalaite tarlan danin, Assembly House-ah CM Zoramthanga'n Mizoram khai chhuahna tura a ruahman, raw ṭha chi lâk luh a nih tur thu leh, a chi supply-tu tur pawh mimal taka a hmelhriat a ni a, thla tin a ṭiak nuai khat a rawn thawn ziah theih thu a sawi a ni. Chutih laiin, RTI Act hmanga zawhna Horticulture department-in an chhannaah, raw chi a lo thlen thu an hre lo a, supply turin tender pawh chhuah a ni lo tih an tarlang thung.

Thil chiang zawk hriat tumin ZPM secretary-te'n Lengte huana raw ṭiak khawina (hardening plant farm) an tlawh a; huan enkawltute chuan, kumin July thlaah mau/rua ṭiak 3,000 a thleng a, August thlaah ṭiak 10,000 a thlen belh leh thu leh, huan chu zing karah CM Zoramthanga'n a tlawh zeuh ṭhin thu leh a fapain a tlawh ṭhin thu an lo hrilh a ni.

ZPM ṭhalaite chuan, mau/rua chungchangah hian thu dik tak hriat chu mipui chanvo a ni tih sawiin, "Zoram mipui hmaa insawifiah turin a changtu Minister hi kan phût tlat a, Mizoram state sum mi tlemtê thil ti thei kutah a luan ral loh nan leh, kut hnathawktute hnen a thlen ngei theih nan ZPM ṭhalai chuan theihtawp a chhuah zel dawn a ni," an ti.