Vawiin aṭangin plastic bag man ṭan dawn

Aizawl Municipal Corpora­tion (AMC) chuan Aizawla Plastic Free City kalpui tura khawpui chhunga plastic pan chi, micron 50 tlinglote khapna, August 1, 2019-a kalpui ṭan chu vawiin, August 26 aṭang hian khauh zawkin an kalpui dawn. AMC mayor PC Lalhmingthanga chuan, "August 26 aṭang hian plastic bag pan chi la hmangte chu kan mansak tawh dawn," a ti.

AMC Mayor chuan Vanglaini palai zawhna chhangin, Aizawl khawpui chhung ward 19 huam chhunga dawr hrang hrangah plastic bag pan chi, AMC-in a khap chin hmang an awm leh awm loh AMC-a thawk official-te'n vawiin aṭangin an vai dawn a; plastic bag an hmuhte chu an mansak zel tawh dawn thu a sawi.

Mayor sawi danin, AMC official-te chu pawl pangaah inṭhenin, AMC ward 19-te chu chan insemin vawiin aṭangin an fang kual dawn a; dawrkaia plastic bag khap chin la hmang an hmuhte chu an chhuhsak ang a, pawisa erawh an chawitir dawn rih lo.

PC Lalhmingthanga chuan, AMC official-te chu August thla tir aṭangin veng hrang hrangah kal kualin, dawrkaite hnenah plastics bag (polythene, etc.) hmang tawh lo tur leh, khauh zawka khapna kalpui hunah chuan mansak an nih tur thu an hriattir tawh ṭhin tih a sawi.

Mayor chuan, "Plastic bag pan chi khap tur thu leh khap a nih tur thu vawi tam tak kan puangzar tawh a, mipui pawhin tunah chuan an hre chiang tawhah kan ngai. Kan khap thla, August thlaah hian khap a nih tawh angin a la hmang luite chu i mansak hman hrâm ang u, kan ti a, August 26 aṭang chuan a la hmang luite chu kan chhuhsak tawh dawn a ni," a ti.

Aizawl Mayor chuan, plastic bag khap chu mipui, ram leh hnam tana thil ṭha a nih avang­in mipui pawhin thu an zawm tura an ngaih thu sawiin, "Hmun tam takah a hlâwkna kan hmu nghal a, bazarpuiah pawh dawr­kai tam tak chuan an hmang duh tawh lo a ni," a ti a; plastic bag khap chin thlakna tur ip dang a awm tam tâwk tawha an ngaih thu a sawi.

Mayor sawi danin, AMC hian August thla tìr aṭang khan councillor-te hmangin university leh college hrang hrangah awareness campaign an nei tawh a, higher secondary school-ah campaign an la nei leh ang. High school chin hnuai lamah erawh chuan councillor-te kal loin, zirtirtute hnenah zirtirtu pawl kal­tlang awareness campaign an ti ang a, zirtirtu chu an sikul ṭheuhah naupangte zirtir chhawng leh turin an ngen dawn a ni.

AMC hian August 1, 2019-a plastic bag pan chi khap a nih ṭan aṭang­in Aizawl kawtchhuah hmun parukah duty an indah a, Aizawla lirthei lut turte hnenah Aizawl­ah plastic bag khap a nih thu hrilhin, plastic keng lutte chu an laksak ṭhin. AMC-in plastic bag a khap chin, micron 50 aia pante zingah Aizawl leh khaw danga mipuiin an hman tlánglàwn zawng zawng a tel deuh vek a, rambo polythene ang chi te, garbage bag-te pawh a tel a ni.