AMC bawlhhlawh paih dan kalphung thar Mipui tihbuai thlawnna mai a ni - MPYCC

Congress ṭhalai, Mizoram Pradesh Youth Congress Committee (MPYCC) chuan August 24, Inrinni khan Aizawl Municipal Corporation (AMC)-in Tuiriala bawlhhlawh an paihna hmun an tlawh a; AMC-in bawlhhlawh paih dan kalphung thar an hman chu mipui tihbuai thlawnna maia an ngaih thu an tarlang.

MPYCC chuan, mipuiin AMC hmalakna ṭha taka an thlàwp laiin, Tuirialah bawlhhlawh sâwngbâwlna mumal an hmuh loh thu an tarlang a, "Aizawl veng hrang hrangah bawlhhlawh lâk khawm dan kalphung a inang lo a, ṭhenkhatah 

ṭawih thei leh ṭawih thei lo an thliar laiin, a ṭhenah an thliar lo. Mipui an buai phah em em laia AMC bawlhhlawh paihna Tuirialah chuan hmun pakhatah an chhûng khawm leh vek si a ni tih a hmunah kan finfiah," an ti.

Mipui tibuaia mumal lo taka bawlhhlawh sawngbawl a ni chu pawi an tih thu tarlangin MPYCC chuan, "AMC sorkar kan hrawn lai mek hian mipui pawi a khawih nasa em em a, a bilha tho lo a nihzia a lang chiang hle. Bawlhhlawh paiha thil dik lo tam tak awm hi sorkar laipuia an lehkha thehluhah chuan dik leh fel ang vekin an lantir a, hei hian hlemhlêtna nasa takin a tizual a ni," an ti a; dik lo leh felhlel taka AMC-in bawlhhlawh paih a kalpui chu tihtawp ngam ni se an duh thu an sawi.

Congress ṭhalaite chuan, plastic leh sarâng lam chi hrang hrangte hman loh tur tia hmalakna an thlàwp rualin, a thliar hranna hmuna thliar hran a ni leh si lo chu hriatthiam har an tih thu an tarlang a, "AMC sorkar hian an inzawrhna free wifi an tihte kha khawiah nge a awm tih kan zawt a, parking fee khawn dan kalphung mumal lo takte hi ṭha lo kan ti a, AMC inthlan leh hunah Aizawl khawpui chhung enkawl turin thlan leh chi ziazáng an nih lohzia a lang chiang hle a ni," an ti.