Damdawi-ina thawktu indaih lohna chinfel thuai a ni ang - Dr Thangtea

Health & Family Welfare minister Dr R Lalthangliana chuan, sorkar damdawi-in hrang hranga thawktu indaih lohna chinfel thuai a nih tur thu a sawi.

Dr R Lalthangliana hian August 23, Zirtawpni tlaia Kawlkulh damdawi-in (PHC) a tlawh ṭumin thu a sawi a, "Sorkarin Health department hnuaiah thawktu chi hrang hrang eng emaw zat a lak thuai dawn avangin thawktu indaih lohna damdawi-in hrang hranga awm hi rei lo têah chinfel a ni ang. X-Ray khawl pawh a dahna tur pindan a bika siam a ngaih avangin a khawl aiin a dahna hmun ṭha neih hmasak a ṭul a, ngaihtuahna sên mek a ni," a ti.

Damdawi-ina thawktute'n an mamawh leh harsatna an neih hrang hrang an sawite chu a ṭul anga en zui vat a nih tur thu Health Minister chuan a sawi. Bialtu MLA L Thangmawia pawhin, Kawlkulh PHC chu uluk taka enkawl a nih thu sawiin, thawktute inpekna a fak a, MLA fund aṭangin generator ṭha tak lei a nih tur thu a puang.

Kawlkulh PHC hi kum 1959 khan subsidiary health centre atan din a ni a, kum 1980-ah doctor-in ṭhutchilh ṭanin, primary health centre-ah hlankai a ni. Kawlkulh PHC hnuaiah hian sub-centre pasarih - Kawlkulh SC, Dulte SC, Hliappui SC, Pàwlráng SC, Chhawrtui SC, Saichal SC leh Vanchéngpui SC-te a awm a ni.