KHAWTHLIR

August 24, Inrinni khan Venghlui Branch KṬP chuan an kohhran hall-ah blood donation camp an huaihawt a, mipa 50 leh hmeichhia 16-te'n Synod Hospital tan thisen unit 66 an pe. Inrinni vek khan Hnahthial Penial Branch YMA-in Lunglei Civil Hospital tan thisen unit 44 pein, petute mipa 39 leh hmeichhia panga an ni a; Champhai Bethel Branch YMA-in Champhai District Hospital tan unit 34 an pe a, petute mipa 31 leh hmei­chhia pathum an ni. Siaha Council Vaih Branch YLA member mipa panga leh hmeichhia pahnihte pawhin Siaha District Hospital tan thisen unit sarih an pe bawk.

Nghalchawm Village Council-a Congress party aṭanga member-te chuan V/C president Vanlalrova hoin MNF party an zawm vek a, bialtu MLA H Lalzirliana'n MNF-ah a lawm lut a ni.

Chief minister Zoramthanga chuan August 24, Inrinni khan August 6, 2016-a thi Sushma Swaraj chhungte chu New Delhi-a an inah a rál. Chief Minister hian amah lo dawngsawngtu Sushma Swaraj pasal, Swaraj Kaushal leh a fanu Bansuri Swaraj te hnenah, Sushma Swaraj chu India ram politician ropui ber zinga mi a nih thu leh hun lo taka a thi chu a uizia leh chànna nasa tak a nih thu a hrilh. Swaraj Kaushal hi kum 1990-1993 chhung khan Mizoram Governor lo ni tawh a ni.

Mizoram College of Nursing (MCON) chuan August 23, 2019 khan an campus-ah zirlai lut tharte lawmna hun an hmang a, Health and Family Welfare Board vice chairman Dr ZR Thiamsanga, MLA leh bialtu MLA Dr F Lalnunmawia ten an hmanpui. Dr ZR Thiamsanga chuan, Mizorama nurse zir chhuakte chu India ram chhunga damdawi-in hrang hrangin an duh bik thu sawiin, zirlaite chu ram páwn thleng pawha thawk thei tura sap ṭawng a tâwk fang thiam tur leh, nursing hmanga damlo enkawl chu Isua rawngbawlna chhunzawmna a ni tih hre turin a chah. MCON-ah hian zirlai lut thar 50 an awm a, awm sate nen zirlai 140 vel an awm mek a ni.