Chawah intodelh tum a ni - CM Zorama

Delhi Mizo Zirlai Pawl (DMZP) chuan August 23, 2019 khan New Delhi-a Mizoram House, Vasant Vihar-ah zirlai kal tharte inhmelhriatna leh inlawmna hun an buatsaih a; khuallian, chief minister Zoramthanga chuan, Mizoram chu chawah intodelh tum a nih thu a sawi.

Chief Minister chuan, hnam humhalh chu mi tin mawhphurhna a nih thu sawiin, "Chutih lai chuan, sum leh pai leh ei leh bara intodelh lo tan chuan hnam thinlung nghet taka put ṭhenkhat tan a har ṭhin avangin, ei leh bàra intodelh chu sorkar ngaih pawimawh ber a ni," a ti.

Mizoram vanneihzia sawiin CM Zorama chuan, "Pathianin boruak nuam tâwk tak, ruahtui tam tâwk leh thlai eng pawh ṭhat duh em emna ram min pe a, a chhunga chêngte pawh ṭawng khat hmang, sakhaw khat vuan kan nih avangin kan inpumkhatna a ṭha bik a ni. Lei chhúng ril hausakna lamah pawh tuialhthei leh gas hai chhuah tur tam tâwk tak a awm niin a lang," a ti a; Mizoramin malsawmna a neihte a nih ang taka hman ṭangkai thiam chu Mizote kutah a innghah thu a sawi.

Ei leh bara intodelhna atan SEDP chak tak leh a ṭha thei ang bera kalpui an tum thu sawiin Zoramthanga chuan, "Chawa intodelh bakah, rua leh mau hmangin nasa taka hmalak tum a ni," a ti.