Zophaia mosque sak chungchangah Kolasib DC leh Hailakandi DC an inbia

Bairabi Zophai, Mizoram leh Assam sorkar, a tu lam mahin khawih loh tura tih (status quo) huam chhunga Assam mite'n mosque an sak chungchangah nimin khan Kolasib DC Zoengsanga leh Hailakandi DC Kriti Joly te an inbia a; mosque sakna hmun chu a hmunah an enho nghal.

Thu dawn danin, inbiaknaah hian Kolasib DC chuan, mosque chu sak thar a nih thu a sawi a, Hailakandi DC chuan sak thar a nih loh thuin a ṭang thung. Kolasib DC rawtna angin mosque sakna hmunah an kal ho a, Kolasib DC chuan hmalakna thar ngei a nih thu a sawi nawn. Hailakandi DC chuan, an lo inràwn tlân ve tur thu sawiin, inbiakna tihtawp a ni.

Inbiaknaah hian Kolasib DC hi Kolasib SP, Bairabi SDC leh official dangte'n an ṭawiawm a; Hailakandi DC pawh Hailakandi SP leh DFO-te'n an ṭawiawm. Tarlan tawh angin, Bairabi Zophai hmuna Mosolman biak-in, mosque hi mi tu tih hriat lohte'n an bomb chhiat avangin sak ṭhat leh a ni a, biak-in bakah hian bungraw dahkhawmna tur nia sawi in pakhat sak belh a ni. Dawrte siam a ni bawk.

Ramri chungchang ngaih­tuah­tu Core Committee-te August 8, 2019-a an ṭhut­khawm ṭumin chief secretary Lalnunmawia Chuaungo chuan Zophaia Mosolman hoin mosque an sak chu an sak chhunzawm lohna atana hma la tur leh, a bula bungraw dahkhawmna tur in sak pawh ṭhiah a nih theihna atana hma la turin Home department hotute a hriattir a ni.

Chief Secretary thusawi kal zelah hian Kolasib DC leh Hailakandi DC-te chu an inbia a; mahse, inbiakna minute chu Kolasib DC hian Chief  Secretary a thawn phawt dawn avangin, inbiaknaa an thurelte mumal taka hriat theih a ni rih lo.