Eye Donation Fortnight pualin free eye clinic
National Fortnight on Eye Donation pualin nimin khan Christian Hospital, Serkawn OPD kawtah hun hman a ni a, a thlawna mit entirna hun buatsaih a ni. District Blindness Control Society (DBCS) -a district programme manager Dr Lalrinthangi, senior medical officer-in a hawng.
Dr Lalrinthangi chuan, mipuite chu an mit ngun taka enkawl tur leh mit ná an neih emaw, mit an tihhliam palh chuan doctor pan vat ṭhin turin a chah a; District Blindness Control Society hmalakna hrang hrang sawiin, kum 2018-19 chhung khan mi 296-te cataract surgery tihsak an nih thu leh, naupang 282 leh puitling 563 hnenah a thlawnin tarmit pek a nih thu a sawi.
Lunglei DBCS-in zirna-in hrang hrangah awareness campaign an neih ṭhin thu sawiin Dr Lalrinthangi chuan, "Mit kan donate in mitmû lak vek a ngai lo a, mit darthlalang chauh lak ṭhin a ni," a ti a; thih hnua mit pek chu mitdelte tan a hlut em avangin, eye donor ni tura inziak lut ṭheuh turin mipui a sáwm.
Free eye clinic hi Christian Hospital medical superintendent Dr Ramzauva'n a kaihruai a; thu sawiin, "Eye Donation Fortnight hi India ram pumah kum tin hman ṭhin a ni a, a tum ber chu mit thlak (eye transplant) mamawhna sang lutuk phuhru thei tura mit pek (donate) pawimawhna mipui zirtir a ni," a ti.
National Fortnight on Eye Donation pual hian Eye Care Centre, Aizawl aṭangin Dr KL Remsanga, Dr C Lalduhkimi leh thawktu dangte'n free eye clinic an buatsaih a, August 29 thleng ni tin neih a ni ang. Eye specialist Dr KL Remsanga chuan, August 26-29, 2019 chhungin a mamawh apiang a thlâwna mit entirna buatsaih a nih tur thu sawiin, "Aizawl pan thei lo mit zai ngaite pawh a thlawna zaisak an ni ang," a ti.
Dr KL Remsanga sawi danin, Aizawl Civil Hospital-ah July 31, 2008-ah Eye Bank hawn a ni a, tun thlengin thih hnua mit donate tura intiam mi 6,894 an awm tawh. Eye Bank kaltlangin mit donate tawh mi 763 (corneal collection) an awm a, chu'ng mit donate-te hmang chuan Aizawl Civil Hospital-ah mit thlak (corneal transplant) 87 tih a ni tawh bawk.