Plastic bag khapna na zawkin kalpui ṭan

Aizawl Municipal Corporation (AMC) chuan August 1, 2019 aṭanga Aizawl khawpui chhunga plastic bag pan chi an khap tawh chu nimin aṭang khan khauh zawkin an kalpui a, plastic bag tam tham tak an man.

AMC hotute hnen aṭanga thu dawn danin, plastic bag pan chi, micron 50 aia pan khapna bawhzui hian nimin khan New Market leh Bawngkawn huam chhungah AMC official-te an kal kual a; dawr hrang hrang aṭangin plastic bag eng emaw zat an man a, an thil man hlut zawng hi cheng sing 4 chuang a ni.

AMC hotute chuan, plastic bag vâi turin group pangaah inṭhen ni mah se, thawktute chu thil dangah hna an neih avangin an la chhuak kim thei lo tih an sawi a, "A tlangpui thuin plastic bag khapna hi dawrkaite'n an zâwm 

ṭha tawh viau a, vawiin (Thawhṭanni)-a an rawn man khawmte pawh hi a tam zawk chu hnam dang dawr aṭanga man a ni," an ti.

Tarlan tawh angin, AMC hian Aizawla Plastic Free City kalpui tura khawpui chhunga plastic pan chi, micron 50 aia pante chu August 1, 2019-ah an khap ṭan tawh a, a tirah khauh takin kalpui lo mah se, nimin aṭang khan khauh zawkin an kalpui a ni.

AMC mayor PC Lalhmingthanga sawi danin, Aizawl khawpuia AMC ward 19 huam chhunga dawr hrang hrangah plastic bag pan chi vâi tur hian AMC official-te chu pawl pangaah an inṭhen a, plastic bag khap chin la hmang an hmuhte chu an chhuhsak ṭan a, pawisa erawh an chawitir lo.

AMC hian August 1, 2019-a plastic bag pan chi khap a nih ṭan aṭangin Aizawl kawtchhuah hmun parukah duty an indah a, Aizawla lirthei lut turte hnenah Aizawlah plastic bag khap a nih thu hrilhin, plastic keng lutte chu an laksak ṭhin. AMC-in plastic bag a khap chin, micron 50 aia pante zingah Aizawl leh khaw danga mipuiin an hman tlánglàwn zawng zawng a tel deuh vek a, rambo polythene ang chi te, garbage bag-te pawh a tel a ni.