KHAWTHLIR
Award lawm
Women & Child Development department-in Poshan Abhiyan (National Nutrition Mission) Award 2018-19 an dawn, 'Overall Excellence in Implementation' leh 'ICDS-CAS Implementation' chu nimin khan Women & Child Development minister Dr K Beichhua hoin a pisaah lawm a ni. Dr K Beichhua chuan, "Pathian ring chunga kan thawh zel chuan hei aia ropui zawk pawh hi kan la dawng thei. In thawhrimna avangin in minister nih a nuam tak zet a ni," a ti.
By-election sawiho
Aizawla local council pathum - Chaltlang, Chhinga Veng leh Kanan Venga by-election neih tur chungchangah nimin khan Aizawl DC conference hall-ah Aizawl bawrhsap Vanlalngaihsaka, district municipal election officer ni bawk hoin official te, Mizo People's Forum(MPF) Gen. Hqrs hruaitute leh veng pathuma MPF local forum hruaitute an inkâwm. LC by-election-ah hian polling station tinah MPF volunteer-te an duty leh dawn a; August 30, Zirtawpni zing dar 7 leh tlai dar 4 inkarah vote thlak a ni ang.
Siahaah meeting
Nimin khan Siaha DC conference hall-ah District Level Coordination Committee on Doubling Farmer's Income an ṭhu a, Committee chairman leh district bawrhsap Bhupesh Chaudhary-a'n a kaihruai. Meeting-ah hian Siahaa sorkar department hotu te, bank hrang hrang hotu te, V/C-te leh DFI atana khaw thlan bika kut hnathawktute an tel a; KVK hotu leh senior scientist Dr H Vanlalhmuliana'n thil pawimawhte a hrilhfiah.
One way enchhin
Aizawla Sikulpuikâwn leh Khatla kâwn inkar kawngpui chu lirthei tlan tam zual lai (peak hour) zing dar 9 leh chhun dar 11 inkarah 'one way' atan enchhin tum a ni a, September 2-6, 2019 chhungin enchhin a ni dawn. Enchhin chhung hian chawhma dar 9-11 chhungin Khatla kâwn aṭangin Sikulpuikawn pana tlan phal a ni dawn lo a, Sikulpuikawn aṭanga Khatla kâwn lam pan chauhin tlân theih a ni ang. He ruahmanna hi a ṭul dan azirin a hmuna traffic police duty-te'n an ti danglam thei dawn a ni.
Tla hlum
Vanlalfaka s/o R Sangkhuma (27), Keiṭum, Aizawla Upper Republic-a khawsa mek chu nimin zing khan Sairang khuaa in an saknaah in chung aṭangin a tla a, Sairang damdawi-in thlenpui a nih hnuah a hliam tuar loin a thi.