Mizoram rawngbawl turin MNF leh Congress-te An hlawhchham tawh tih a chiang - Lalchhuanthanga

ZPM chuan nimin khan an pisaah chhung inkhawm an hmang a, thu sawitu Lal­chhuanthanga, MLA chuan, Mizoram rawngbawl turin MNF leh Congress party-te chu an hlawhchham tih a chian tawh thu a sawi.

Inkhawm hi ZPM vice president Rev. Darchungnunga'n a kaihruai a; Lal­chhuanthanga chuan, "Hun rei tak chhung political party lian pahnihin Mizoram an inhruai chhâwk a, thuneihna nena min hruai thlen theih chin hi, India rama state rethei ber, hnufual ber dinhmun hi a ni. Mizoram rawngbawl turin heng pawl pahnihte hi chu an hlawhchham tawh tih chiang takin a lang a, chuvangin kalphung thar, mipui sorkar din tumtu pawl hi rintlak berah ka ngai," a ti.

Lalchhuanthanga chuan, ei leh bara Mizoram a intodelh ve thei lo tlat te, hmasawnna muang bik lutuk te, power supply leh kawng a nei chhe lutukte chu a vei thu sawiin, "Mizoramin hma a sawn loh bik chhan hi kan ram leilungin a zir loh bik vang a nih ka ring lo a, a kaihruaitu te, thawktute mawhphurh niin ka ring," a ti a; tun aia dinhmun ṭha zawka Mizoram hlángkai turin tih theih tlem tal a neih ve beiseia politics-a a luh thu a sawi.

A ngaihdan ang ngaihdan nei Mizoramah an tam hle tih a lan chianna chu, MLA inthlan hnu­hnung berah ZPM chu inbuatsaih ṭha hman lo chungin bial pariatah mipuiin an thlang tling kha a ni tih sawiin Lalchhuanthanga chuan, "Ram kalsiam turin ZPM party a inbuatsaih a, hruaitu tharte'n mawhphurtu thar tur an ruat mek. Party thar kan ni a, kan awm ṭhinna party tih dan chhawm tum tlatna hi inpumkhatna atan a hnawk ṭhin. Hotu neih a tâwk lo a, hruaitu ṭha neih kan mamawh," a ti.

Lalchhuanthanga chuan, hotu nih inchuh chu pawl tan a hnawk tih sawiin, "Nihna inchuh hi ZPM nen a inhmeh lo. Hruaitu ṭha chu mi hnuaia kûn thiam nih a ṭul. Hruaitu nih inchuh hi kan inhmeh lo em em a ni. Kan hruaitute remruat dan hi a ṭha famkim hauh lo ang a, thuràwn pe chung zelin kan zah thiam a pawimawh," a ti a; ngaihdan inang lo a awm pawhin, inzah tawn nachang an hriat chuan ZPM-in hmabak êng tak an neih thu a sawi.