Ran natna laka Mizoram him theih nan Mizoram mipuite thawhpuiah sáwm

Animal Husban­dry and Veterinary (AH&Vety) minister Dr K Bei­chhua chuan, ran natna hlauhawm African Swine Fever leh Porcine Reproductive and Respiratory Syndrome (PRRS) lakah Mizoram a him theih nan Mizoram mipuite thawhpuiah a sáwm.

Dr K Beichhua chuan nimin khan Mizo Hnam Runa inkhawmah thu sawiin, PRRS vangin kum 2013, 2016 leh 2018-ahte Mizoramah vawk tam tak a thi tih a sawi a, "MNF party-in sorkarna kan chan hnua PRRS hriin min la nuai lo hi a lawmawm tak zet. African Swine Fever hi ran natna hlauhawm tak, a kai tawh vawkte tan thih ngei ngeina a ni," a ti a; African Swine Fever chu Mizoram ṭhenawm Myanmar-ah hmuh a ni tawh tih a sawi.

Ram dang aṭanga vawk lak luh dang turin district magistrate puihna ngen a ni tawh tih sawiin K Beichhua chuan, "Central YMA leh tlawmngai pawl hrang hrang pawh heng natnate hi do a, ram dang aṭanga vawk lak luh dang tur hian thawhpuiah kan sawm a, kan thawkho mek a ni," a ti.

AH&Vety Minister chuan, AH&Vety department-in Mizoram mamawh sa chi hrang hrang 35% chauh a thar chhuak tih sawiin, "Saa kan intodelh theih nan sorkarin nasa takin hma a la chho mek; sa, artui, ar notêa kan intodelh theih nan project tam tak thehluh a ni tawh," a ti a; saa intodelhna tura sorkar hmalaknaah an hlawhtlin ngei an beisei thu a sawi.

Excise & Narcotic minister Beichhua chuan, zu leh ruihhlo do kawngah sorkarin nasa takin hma a la mek tih sawiin, "Kan programme hi Pathian duh dan a nih avangin Pathian kaih­hruaina kan chang nasa hle. Kan hnungah mi ṭha tak tak min pe a, kohhran leh Central YMA-in theih­tawp chhuahin hma min lakpui a, Home department leh Assam Rifles aṭang pawhin theihtawp an chhuah a ni. Thawktu indaih lohna tiziaawm turin sorkarin hna lak thar a tum leh mek a ni," a ti.