Tlungvel V/C ṭhiah leh Court order chungchang MNF party-in an sawifiah

MNF party chuan thuchhuah siamin, MNF sorkarin Tlungvel V/C a ṭhiahna order Court-in a tihtawpsak anga sawi chu thu dik lo niin an tarlang a, "Court hian Tlungvel V/C-te chu ṭhiah an nih lohna chhan sawifiah turin a ti zawk a ni," an ti.

Mizoram sorkarin August 6, 2019 khan Tlungvel V/C a ṭhiah avangin Tlungvel V/C-te chu Gauhati High Court-ah an zualko tih sawiin MNF chuan, High Court chuan August 21 khan order tichhuakin, Tlungvel V/C-te chu a ngai anga kal tur anga sawi chu thu dik lo a ni," an ti a; Court order-ah chuan V/C-te chu ṭhiah an nih loh chhan tur insawifiahna hun a pe zawk niin an tarlang.

MNF party tarlan danin, Tlungvel V/C-te hian zangnadawmna lâk an duh avangin anmahni hmingin dan loin ram an inpe a, an ram inpek chu Land Revenue & Settlement department-ah an paihtir leh vek tawh a, LRS department hotute chuan DC office aṭanga thu chhuak hriat an neih thu an sawi.

Tlungvel Group MNF-in V/C ṭhiah a nih vanga circle inspector hoa Advisory Board member tur an lo siam lâwk vek tawh anga an sawi leh mawhphurhna pawh an insiam rem tawh anga sawi chu thu dik lo a nih thu LRS department hotute'n an sawi nia tarlangin MNF chuan, "Advisory Board hi circle officer-in thuneitute hnena a rawt hnuah chauh pawmpui theih a nih thu an sawi a ni," an ti.