Vety officer transfer order sût phût

Bairabi Coordination Committee (BCC) hruaitute nimina ṭhukhawm chuan, an khuaa AH&Vety officer Khawzawla awm tura transfer order tihchhuah tawh chu sût leh turin sorkar an ngen a, an ngenna a hlawhtlin loh chuan a ṭul anga hmalak an tum. 

BCC chuan, an khuaa AH&Vety officer sawn a nih tur thu an hriat veleh bialtu MLA K Lalrinliana leh AH&Vety minister Dr K Beichhua te an hmu nghal tih an sawi a, "Thu lawmawm hriat tur a awm loh avangin September 6, 2019 thleng transfer order cancel turin sorkar ngaihchan leh ni se kan ti a, hun tiam chhunga transfer order hi cancel a nih loh chuan a ṭul anga hmalak kan tum. Transfer order cancel nghah a nih chhung hian Bairabia Vety officer hi a chhuah kan remti lo a, khawtlang mipuiin kan dang tlat dawn a ni," an ti.

Bairabi-a AH&Vety officer awm tawhte'n an khuaa awmchilh lo a, Kolasib aṭangtea an vil ṭhin thu tarlangin BCC chuan, "Inter state boundary-a awm kan nih avang hian state páwn aṭanga ran lak luh chungchangah fimkhur a ṭul hle a, doctor min awmchilh theitu leh ṭhahnemngai taka thawk thei tur kan mamawh. Chutiang doctor ṭha leh min awmchilh ṭhatu kan neih mek lai transfer order a chhuak hi pawi kan ti hle a ni," an ti. Transfer order cancel a nih theihna atan theihtawpa hmalak zel an tum thu an puang a ni.