Kawng siam tak tak loah MNF sorkar puh

Congress ṭhalai, Mizoram Pradesh Youth Congress Committee (MPYCC) chuan nimin chhun khan Sairang leh Kawnpui inkar NH-54 kawngpui an enfiah a; kawngpui chu a chhe hle tih sawiin, MNF sorkarin kawng an lo siam tak tak lo tih an hmuh chhuah thu an tarlang.

MPYCC hruaitute chuan, Buichali-Kawnpui inkara NH-54 kawngpui chu Mizorama ei leh bâr lak luhna kawngpui pawimawh a ni chungin, MNF sorkarin an ngaihthah hle tih an finfiah thu an sawi a, "Tun thla riat chhung hian sorkarin kawngpui siam an ngaihthah hle tih kan finfiah. Congress sorkar lai khan kawng siamna tur cheng nuai sing chuang dah a ni a, pawisa hi sorkar thar MNF kutah awmin an hmang thiam lo a, ei leh bara Mizoram châwmna kawng ber pawh an siam duh lo a ni," an ti.

MNF sorkarin Mizoramah kawng chhia a awm tawh lo ang ziazángin 'Mizoramah kawng chhia a awm tawh lo' tiin an sawi nia sawiin MPYCC chuan, "Mizoramah kum tam tak chhunga kawng chhiat ber lai kan hma­chhawn mek. Ei leh bàr lak luhna ber kawngpui a chhiat nasat em avangin Mizoramah ni tin mamawh a vâng a ni," an ti a, gas thlengin a harsa niin an sawi.

Kawng siamna tur sum tam tak Congress sorkarin a hnut­chhiah chunga MNF sorkarna hnuaia Mizoram hmun hrang hrang kawngpui a chhe nasa lutuk leh sorkarin a ngaihthah lutuk chu pawi an tih thu sawiin Congress ṭhalaite chuan, NH-54 kawngpui, Buichali leh Kawnpui inkar chu a rang lama siam turin sorkar an phût a ni.