Lokayukta budget tihhniam a ni
Eiruk thubuai chhui tura Mizoram sorkarin a din Lokayukta sum hman tura ruahman chu sorkar kum kal mek 2019-2020 aiin sorkar kumthar 2020-2021 ah cheng nuai 74.22 a tihhniam a ni. Vanglaini palai zawhna chhangin Lokayukta chairman C Lalsawta chuan kum 2020-21 hian hnathawhna tur tak tak pawisa a awm dawn loh thu a sawi.
Lokayukta sum hmanna tura ruahman zingah ukil (lawyer) rawihna tur (professional service) pawh telh a ni lo. Demands for Grant 2020-2021 ah Lokayukta hi Vigilance department hnuaiah a lang a, Salary & Employment buah erawh a lang lo thung. Kum 2020-21 budget-ah hian Lokayukta chu kum hmasa lama pawisa hman tura tih engemawzat paihsak an ni. Hetihlai hian thawktu erawh tun hnai khan pek belh an ni.
Vanglaini-in professional service atana pawisa pek an nih tawh dawn loh chungchanga zawhna chhangin Lokayukta chairperson C Lalsawta chuan, "Kan hmanna tur ber chu lawyer-te chhawrna tur a nimai. Police-te'n investigation an han zo ang a, Special Court-ah chargesheet bawhzui a ngaih dawn hunah lawyer-te chhawrna tur kan nei dawn lo a ni," a ti.
C Lalsawta chuan Lokayukata chuan hnathawkte hlawh leh inrelbawlna bak hnathawh tak takna tur sum an neih dawn loh thu sawiin, "Hnathawhna tur object head pawimawh zawng zawng paihbo vek a ni," a ti a, object head 13 na office expenses-ah pawh sorkar kum kal mekah nuai 35 pek annih laiin sorkar kum tharah chuan cheng nuai 10 pek an nih tur thu a sawi.
Kum 2019-2020 budget-ah Mizoram sorkar chuan Lokayukta-in hna a thawhna atan nuai 371.06 a pe a, kum 2020-2021 atan chuan nuai 296.84 chiah a pe a, kum hmasa aia a pek tlemna chu nuai 74.22 a ni.