Vawiinah AMC inthlan a ni dawn Ward 19-ah candidate 66 an awm

Vanglaini palai zawhna chhangin SEC secretary Teresy Vanlalhruaii chuan, inthlan buatsaih turin an inpeih tawh tih a sawi a, "Vawiin (nimin) hian polling party-te'n an duty-na hmun tur an thleng vek dawn a, tun ṭum inthlan turah hian polling station venhim zual ngai bik a awm lo," a ti a; tluang takin inthlan neih theih an beisei thu a sawi.

Teresy Vanlalhruaii chuan, EVM ṭha lo palhte thlakna tur an neih ṭhat tâwk thu sawiin, "Ward 19 atan hian sectoral magistrate eng emaw zat ruat a ni a, anni hian an huam chhunga EVM chhe palh a awm pawha thlak zung zung a nih theih nan EVM spare an kawl ang. Venhimna lamah pawh police-te'n ruahmanna engkim an peih tawh a ni," a ti.

Tun ṭum inthlan turah hian December 21, 2020-a tih chhuah AMC roll hman a nih dawn thu sawiin SEC Secretary chuan, "ECI-in AMC mother roll atan LC/VC inthlan hnuhnung ber roll hmang turin min ti a, chumi behchhan chuan January 1, 2020-a kum 18 tling, roll-a inthun dilte thun belh a ni," a ti a; Election department-in electoral roll a tihchhuah hnuhnung ber nen hriat pawlh loh tur a nih thu a sawi.

Tun ṭum AMC inthlanah hian Bharatiya Janata Party (BJP), Indian National Congress (INC), Mizo National Front (MNF) leh Zoram People's Movement (ZPM)-te'n candidate an nei. INC, MNF leh ZPM-ten ward awm zawng zawng 19-ah candidate an nei vek a, BJP-in ward pakuaah candidate an nei thung. 

Vote thlaktute'n him leh awlsam, hun khawhral lo zawka vote an thlak theihna tur leh voter-te hripui laka an him theihna turin AMC huam chhunga polling station awm sa 226 bakah 48 siam belh a ni. EVM thar ber, VVPAT awmna ECI-in hman an phal lo a, EVM hman ngun ber ang hman a ni ang.

Tun ṭum inthlan atan hian polling station bulah political party-te leh candidate-te awm khawm nan common election camp pakhat ṭheuh siam phal a ni. Camp hi a mâwlmang thei ang bera siam tur a ni a, flag, poster, symbol, etc. tàr phal a ni lo. Party tinte pawm tlàn theih tur tualchhung mi (NGO/MPF/LTF) duty tel tura beisei a ni.

AMC ward 19 zinga paruk - III, VIII, X, XIV, XVI leh XIX-te chu hmeichhe tana hauh (reserve) a ni a, a bâk zawng chu general ward a ni. General ward-a ding zingah hmeichhia pahnih an awm.

Inthlana vote tlate chu February 18, Ningani chawhma dar 10-ah Pachhunga University College-ah chhiar a ni dawn a, vote chhiarna atan block paliah counting hall siam a ni. Ward zawng zawng a ruala chhiar a ni dawn a, round 4 leh 5 chhiar zawh vek tura ruahman a ni.

Inthlan turah hian AMC sorkar kal tawh pahniha councillor zinga mi pariatin tun ṭumah hian an chuh nawn a, chu'ngte chu MNF councillor panga leh INC councillor pathum an ni. An zinga pahnih chu AMC sorkar hmasa ber (2010-2015)-a councillor ni tawh, term hnihnaa tling lote an ni.

•    Zing dar 7 aṭanga tlai dar 4 chhung vote thlak tur a ni

•    Polling station venhim zual bik ngai a awm lo

•    EVM a chhiat palhin a thlakna tur a tam tawk

•    December 21, 2021-a tlangzarh AMC roll hman a ni ang

•    INC, MNF leh ZPM-te'n ward tinah candidate an nei

•    BJP-in ward pakuaah candidate an nei

•    Polling station 48 siam belh a ni

.    February 18-ah vote chhiar a ni ang