KHAWTHLIR

State Election Commission chuan, AMC inthlan awm turah Election Model Code of Conduct (MCC) bawhchiaa inpuhna report pahnih an dawng. SEC hotute hnen aṭanga Vanglaini thu dawn danin, MCC bawhchhiaa inpuhna report an dawnte chu a buaipuitu tur Aizawl DC pisa lamah thawn a ni a, anni hnen aṭangin an hmalak dan report SEC-in an la dawng lo.

Mizoram State Day vawi 35-na, February 20, 2021-a lo thleng tur chu Mizoram sorkar chuan Vanapa Hall-ah a lawm dawn. State Day lawmnaah hian sorkar hnathawk Junior Administrative Grade chin chung lam, Aizawla awmte chu tel vek tura hriattir an ni a, district dangah chuan DC-te kaihhruaiin lawm tur a ni bawk.

Hnahthial District Core Team on Skill Development Framework chuan nimin khan KVK Training hall-ah ar vulh zirna an buatsaih ṭan a, Hnahthial bawrhsap Vanlalmawia'n a hawng. Training-ah hian mi 20 an tel a, ni 15 chhung neih a ni ang. Mizoram Youth Commission sum pek Rs. 9,00,346 hmangin Hnahthial College-ah cement mistiri zirna kalpui mek a ni bawk.

February 2, 2021 aṭanga National Immunisation Day kalpuiah Lawngtlai district-a nausén piang hlim aṭanga naupang kum 5 chin mi 15,924 hnenah zenghri danna pek a ni tawh a; hei hi Lawngtlai district-a zenghri danna pêk tura ruahman mi 16,106 aṭangin 98.9% a ni.

State Referral Hospital-ah nimin khan Covid-19 vei mi pakhat dah luh a ni a, mi pakhat chhuahtir a nih bakah, mi pakhat a thi. SRH-ZMC Bulletin tarlan danin, SRH-ah hian Covid-19 vei vangin mi pali enkawl mek an ni a, an zinga mi pakhat chu ICU-ah awmin, ventilator hmanga enkawl mek a ni. Isolation ward-a awm mi pathumte'n harsatna lian tham an nei rih lo.