Covid hripui vanga enkawl lai a thi

Covid-19 vei vanga State Referral Hospital-a enkawl lai T Pazawna (82), Ramhlun North chu nimin zing dar 6 khan enkawlna hmunah a thi a, nimin vêk khan Ramhlun North thlànmualah vui a ni.

Sorkar thuchhuah tarlan danin, T Pazawna hi January 30, 2021 khan Aizawla damdawi-in pakhata a inentirnaah Covid-19 positive a ni tih hmuh chhuah a ni a, SRH-ZMC-ah lâk nghal a ni. SRH-ah hian hun rei tak ICU-ah awmin, ventilator hmantir reng a ni.

Hetih lai hian, T Pazawna hi kar hmasa tàwp lam khan a swab sample endiknaah Covid-19 a vei tawh lo tih hmuh a ni a; mahse, Covid-19 vei thi anga chhinchhiah niin, hripui vanga Mizorama thi 10-na a ni ta a ni.

Health minister Dr R Lalthangliana chuan, Covid-19 hri léng kaihhnawiha T Pazawna'n chatuan ram a pan ta chu pawi a tih thu a tarlang a, "A chhungte leh amah lainattute thinlung takin ka tawrhpui a, theihtawp chhuaha enkawltute chungah lawmthu ka sawi bawk e," a ti.