Bill lema Rs. 35,85,000 lâk thubuaia Thiam loh chantirte hremna tur puang

Disaster Management & Rehabilitation (DMR) department aṭanga silpauline bill lem hmanga Rs. 35,85,000 lâk chhuah thubuaia thiam loh chantir tawh mi palite hremna tur chu nimin khan Special Court (Prevention of Corruption Act) chuan a puang.

Thu dawn danin, special judge (PC Act) Vanlalenmawia court chuan thiam loh a chantir tawh mi pali zinga sorkar hnathawk pathum - pawisa lak chhuah hun laia DMR director PC Lalthlamuana (75), Zarkawt, cashier Lalhmingliani (58), Republic Veng leh LDC R Vanlalhmuaka (55), Mission Vengthlangte chu kum hnih ṭheuh jail-a táng turin a hrem. Silpauline supplier Thanzami Tochhawng (76), Venghlui erawh chu kum khat táng turin a hrem thung.

Sorkar sum eirûk thubuaia thiam loh chantir leh jail-a táng tura tih tâk mi pali ukilte chuan bail an dil nghal a, court chuan bail a phalsak nia thu dawn a ni.

Tarlan tawh angin, Zarkawt veng mi mipa pakhatin June 23, 2006 aṭanga July 3, 2006 chhunga DMR department aṭanga silpauline bill lem hmanga Rs. 35,85,000 a lâk chhuah thubuaiah hian mi palite chu February 12, 2021 khan Special Court-in thiam loh a chantir a; February 27, 2013-ah ACB-ah complaint thehluh niin, ACB-in an chhui zui a ni.

Thubuaia hming lang pakhat chu thubuai ngaihtuah laia a thih avangin a thubuai tihtawp a ni a, mi pakhat chu thiam chantir a ni bawk.