Valentine's Day pualin mi 466-in thisen pe

Association for Voluntary Blood Donation (AVBD), MSACS leh blood bank-te chuan nimin khan Valentine's Day pualin thisen pek rûnpui, Valentine's Day Blood Donation Camp an huaihawt a; mi 466-in thisen an pe.

Valentine's Day Blood Donation Camp hi Aizawl leh district hrang hranga blood bank-ahte huaihawt a ni a; Aizawlah chuan Model Blood Bank, Civil Hospital-ah neih a ni. A hawnna inkhawm tâwi chu AVBD president C Lalnunnema'n a kaihruai a, MSACS project director Dr Lalthlengliani'n ribbon chep chatin a hawng.

Dr Lalthlengliani chuan, Mizo ṭhalaite zingah thisen pek nacháng hria an pung zel chu lawmawm a tih thu a sawi a; thisen mamawh an awm reng avangin vawi khat mai ni lo, thla thum dana pe ṭhin turin ṭhalaite a sáwm.

AVBD President chuan, Valentine's Day puala thisen pek chu Mizoramah kum 2010-ah ṭan a nih thu sawiin, "Thisen pek ní atana Valentine’s Day hmang hmasa ber chu Mizoram kan ni a, thisen pek kawngah Mizoramin India ram tan méllung pawimawh tak a phun a, state dangte pawhin min entawn a ni. Valentine’s Day hi hman sual theih a nih laiin, Mizoramah chuan hman dan ṭha berin ṭhalai tam takin an hmang a, a ropui tak zet a ni," a ti.

Kum 11 (2010-2020) chhungin Valentine’s Day puala thisen pek tawh zat chu unit 7,342 a ni a; kuminah unit 466 pek niin, kumina pek nen pek tawh zawng zawng chu unit 7,808 a tling ta a ni.