Mizoramah MSACS-a inziak lut Ruihhlo ti ṭhin mi 10,977 an awm

Mizoram State AIDS Control Society (MSACS)  hnuaiah ruihhlo ngai inziak lut zat chu mi 10,977 an ni a, hei hi MSACS target mi 12,100 aiin a tlem zawk.

MSACS-in February 11, 2021-a Planning conference hall-a an thawhpui, ruihhlo vanga harsatna tâwk tawh ṭhin leh tâwk mekte leh OST la mekte nen inràwn khawmna an buatsaihnaa MSACS joint director Betty Lalthantluangi tarlan danin, sorkar kum kal mek 2020-21 chhunga ruihhlo ngai enkawl tura MSACS target chu mi 12,100 an ni a, chutih laiin, mi 10,977 an inziak lut a, target hi 1,123-in a tling lo.

Mizoramah ruihhlo ti ṭhin, MSACS hnuaia April-December, 2020 chhunga inziak lut thar mi 855 an awm a, chu'ng zinga mi 343 chu Aizawla mite an ni. MSACS hnuaia tum bik neia hmalakna, Targetted Intervention (TI) project-a HIV kâi awlsam bika ngaih (high risk group)-te project-a an ziah luh (register) zingah, an ziah hma aṭanga HIV hrik kái tawh sa 36% an awm a ni.

Mizorama ruihhlo ti ṭhin zingah MSACS leh an thawhpuite hnena inziak lut lo eng emaw zat an awm a, chu'ng mite chuan an nu leh pate leh khawtlang mipui hriat an hlauh vang te, sikula an zirtirtute hriat an hlauh vangte leh ruihhlo ngai anga an inpawm loh avangtein an ziak lut duh lo ṭhin.

MSACS project director Dr Lalthlengliani chuan, ruihhlo vanga harsatna tâwk mekte aiawha kal khawmte chu thawhpuiah sâwmin, field level-a an kutke leh beng ber an nih thu a sawi a; harsatna an tâwk a nih chuan pui tura an inhawn reng thu a sawi.