NH-6 Kawlkulh leh Dulte paltlangtir duh

National Highway (NH) no. 6 chungchangah Kawlkulh & Dulte Joint NGO Coordination Committee chuan thuchhuah siamin, Kawlkulh leh Dulte khawtlang mipuite‘n NH-6 by-pass road a awm an remtih ngai dawn loh thu an tarlang.

Kawlkulh & Dulte Joint NGO chuan, NHIDCL-in December 14, 2020-a e-tender a tihchhuah‚ Upgradation to 2 lane with paved shoulders of Dulte Champhai road (interation corridor) of NH-6 from design chainage km. 54.400 to km. 72.350 (package -D) in the state of Mizoram under Bharatmala Pariyojna on EPC mode‘ ah Dulte leh Kawlkulh hêlin (bypass) km. 17.95 anga tarlan a nih thu an sawi.

Joint NGO chuan, by-pass hi Dulte aṭanga Tuivawl lam km. 6 vela awm nia sawiin, "Dulte leh Kawlkulh inkar hi km. 9 a ni a, nikum lama Chief Minister-in PWD surveyor-te a ṭul anga survey ṭha leh tura a rawn tirhte nen Kawlkulh-Tuichang by-pass road tur survey-tute chuan km. 6.5-in an survey chhuak a ni," an ti.

An tarlan danin, Dulte thlang, by-pass road survey inṭanna aṭanga Dulte leh Kawlkulh paltlangin, Kawlkulh leh Tuichang inkar kawng awm sa paihin kawng thui zawng chu km. 21.05 a ni a, bypass road km. 17.95 aia a seina chu km. 3.1 a ni. By-pass road km. 17.95 anga chhût pawh a ram chin hre chiangte chuan kawr ruam leh mual inkham dan aṭangin km. 20 a tling thuak turah an ngai.

Kan rama tlangdung inkham danin a zir loh avangin khawchhak lam a chengte tan kawng duhthusama sial theih a ni lo tih tarlangin Jt. NGO chuan, "Tlangdung zuia kawng sial a nih ve theih loh avangin en maia hnai tak hi a takah a hnai lo fo. Chutiang chiah chu tuna Kawlkulh & Dulte by-pass road final survey pawh a ni," an ti.

Joint NGO chuan, NH chu Kawlkulh leh Dulte khua mai ni lo, a chhehvela khaw eng emaw zatte eibàr zawnna kawng a nih thu sawiin, "NH-102B-in he lai bial a bypass hnua sum leh pai lo luang lut tlakhniam dante chhûtin, Kawlkulh leh Dulte khawtlang mipui chuan NH-6 bypass road a awm kan remti ngai dawn lo," an ti a; NH chu an nunna hrui lian ber a nih thu an sawi.

Chief Minister hnenah lawmthu sawiin, "January 6, 2021-a Kawlkulh Highway Restaurant-a bial mipui harsatna min ngaihthlaksak a, NH-6 in Dulte leh Kawlkulh a paltlang ngei tur thu min hrilh hi thlamuanthlak kan ti tak zet a ni," an ti bawk.