Alcoholic drink-te man theih a ni

Excise & Narcotics department (END) chuan thuchhuah siamin, tunlaiin Mizoramah khawchhak lam aṭangin zu lam chi in theih (alcoholic drink) chi hrang hrang (Korean soju, wine cooler, etc) lâk luh a awm a, dawr, restaurant, hotel leh online-a zuar an awm tih hriat a nih thu an tarlang a; alcoholic drink-te chu dan anga man theih a nih thu an puang.

END chuan, May 28, 2019 aṭangin zu khapna dan The Mizoram Liquor (Prohibition) Act, 2019 (MLP Act) hman a nih thu sawiin, "He dan hnuaiah hian zu siam, in, lâk luh, zawrh leh hralh, phurh kualte khap a ni," an ti.

Alcoholic drink-te chu MLP Act Section 2(r)-in 'zu/liqour' tia a tarlan a nih thu tarlangin END chuan, "Alcoholic drink-te in, la lut, zuar, hralh, phur kualte chu MLP Act Section 6 & 7 tlawhchhana hrem theih an ni," an ti a; ruihhlo leh zu do kawngah dan kengkawhtute thâ tichak turin Mizo mipui an sáwm bawk.