COVID-19: Mizoram dinhmun

February 14, Pathianni khan Mizoramah Covid-19 vei hmuh chhuah a ni lo a; nimin khan hripui laka fihlim tawh mi 1 chhuahtir an ni. Nimin vêk khan Covid-19 vei vanga State Referral Hospital-a enkawl pakhat a thi.

Pathianni khan True-NAT-PCR hmangin sample 14 leh RAT hmangin sample 114 endik ni mah se, Covid-19 positive an awm lo a; hripui vei vanga enkawlte zinga dam tawh mi pakhat chu nimin khan Lunglei Pûkpui CCC aṭangin chhuahtir a ni.

Hetih lai hian, Covid-19 vei vanga enkawl T Pazawna (82), Ramhlun North chu nimin zing dar 6 khan enkawlna hmunah a thi a, hripui vei Mizorama thi 10-na a ni.

Mizoramah Covid-19 vei mi 4,392 hmuh chhuah a ni tawh a, mipa 3,214 leh hmeichhia 1,178 an ni. Nimin tlai dar 5 thleng khan mi 4,367 (99.43%) chhuahtir an ni tawh a, mi 10 (0.23%) thi tawhin, enkawl mek mi 15 (0.34%) an awm.

February 14, 2021 thlenga Mizorama swab sample endik tawh zat chu 2,20,610 a ni a, chu'ng aṭanga Covid-19 positive mi 4,392 chu 1.99% a ni. Hripui vei hmuh tawh zinga mi 2,081 chu Mizoram chhunga kái an ni a, mi 2,311 chu Mizoram páwn aṭanga an rawn luh hnua hmuh chhuah an ni thung.