MPSC-in group B hna lak tura advertisement la chhuah lohte department-ah an pe lêt dawn
Mizoram sorkar department-te'n Mizoram Public Service Commission (MPSC) hnena sorkar hnathawk group B (non-gazetted) la tura an thawn, MPSC-in hna lakna tura advertisement an la chhuah hman si lohte chu a petu department-ah an pe lêt dawn.
MPSC aṭanga Vanglaini thu dawn danin, sorkar department-in hna lak tura an thawnah, MPSC-in advertisement an la chhuah hman si loh zingah group B (non-gazetted) tur eng emaw zat a awm a; chu'ngte chu a petu department-ah an thawn lêt leh vek dawn a ni.
Group B (non-gazetted) hna la tura advertisement an chhuah hman chin chu MPSC hian an la buaipui chhunzawm zel a, hna lakna atana exam buatsaih mekte pawh a awm. Hetih lai hian, group B (non-gazetted) chin hnuai lam hna lak hna buaipuitu tura Mizoram sorkarin din a tum, Mizoram Subordinate Services Selection Board (MSSSB) chu din a la ni lo. Department of Personnel and Administrative Reforms (DPAR) hotute chuan, MSSSB atan hian rules buaipui mek a nih thu an sawi.
DPAR hotute sawi danin, MSSSB rules peih a la nih loh avangin chairman leh member tur ruat a la ni lo a, chairman leh member bakah, post dang siamte pawh a ngai dawn a ni. Tarlan tawh ṭhin angin, June 10, 2019-a Council of Ministers ṭhukhawm chuan MPSC-in Mizoram sorkara thawk tur lakna a khawih ṭhin zinga group B (non-gazetted) chin chu MPSC aṭanga laksak a, group-B (non-gazetted) chin hnuai lam lakna buaipui turin MSSSB din an rêl a ni.
Sorkar thuchhuah tarlan dan chuan, MPSC kaltlanga hna lak tam lutuk chhâwk zângkhaina atan leh an hna lak leh thawh turte a hun tak zela an lak theihna atan group-B (non-gazetted) recruitment chu MPSC mawhphurhna aṭanga lak chhuah Cabinet chuan an rél a ni.
Cabinet thutlukna avang hian MPSC chuan July 22, 2019 aṭang khan group B (non-gazetted) post lak hna an buaipui tur leh buaipui laklawhte pawh khawih chhunzawm lo turin thutlukna an siam. Chutih laiin, MZP hruaitute chuan June 23, 2019 khan MPSC thutlukna chungchangah chief minister Zoramthanga an kâwm a; Chief Minister chuan, MPSC-in group B (non-gazetted) post lak hna a buaipui laklawhte chu MPSC-in an khawih chhunzawm tur thu a lo hrilh. Sorkarin hriattirna thar a chhuah leh hnuah MPSC pawhin an khawih chhunzawm leh a ni.