FCSCA dept.-in an kudam mimalin an luahte dan anga kalpui a nih leh nih loh an chhui dawn

Food, Civil Supplies & Consumer Affairs (FCSCA) department chuan, Vairengtea an department kudam, mimal an luah hawhtirah dan loa sumdawnna bungruate dah ṭhin nia sawi chu an chhui chiang dawn.

Vanglaini palai zawhna chhangin FCSCA department hotute chuan, department kudam mimal an luahtir dawna agreement siamte chu August 26, 2019 khan FCSCA Secretary hoa en chian a nih thu an sawi a, "Agreement-ah hian eng bungrua nge dah tur tih a awm mumal lo. Kut hnathawktu leh mirethei zawkte hmá ngaia bungraw dah khawmna atana rilru ṭha taka inluahtir a ni," an ti.

FCSCA department hotute sawi danin, FCSCA kudam pakhat chu kum 2016 aṭang khan mimal luahtir a ni a, kudam inluahtir dawnah hian forwarding-ah chuan sawhthing leh hmunphiah dahna atana tih a nih lain, agreement-ah chuan bungraw dah tur a inziak lo. Kudam pakhat zawk chu kumin aṭanga mimal luahtir a ni a, bungraw dah tur ziaka tarlan a awm lo bawk.

Supply department kudam luahtu pakhat chuan nimin khan FCSCA department hotu pakhat hmuin, kudamah kuhva an dah thu te, dan ang thlapa kuhva chu supply an nih thute leh, leiṭha an dah ve ngai loh thute an hrilh.

FCSCA department hotute chuan, kudamah hian eng bungrua nge dah a nih a, dan loa thil tih a awm em tihte enfiah turin supply inspector-te an hriattir thu an sawi a, "Kolasib DC aṭangin official-in kan department kudam chungchangah hian dawn kan la nei lo. Enfiah a nih hnuah dan loa sumdawnna bungrua dah a nih chuan hmalak theih a ni ang," an ti.

Tarlan tawh angin, Kolasib DC Zoengsanga hoin August 20, 2019 khan Vairengte leh Chhimluang inkara NH-54 kawngpui kama kudamte enfiah a ni a, dan loa sumdawnna bungrua kuhva leh leiṭha dahna kudam nia hriat 15-te chu August 20 leh August 21-ah kalh a ni. Kudam enfiah zingah hian FCSCA kudam pahnih tel ve mah se, kalh an ni ve lo thung.