Minister's conference-ah Chief Minister a tel

Nimin khan New Delhi-ah Jal Shakti minister Gajendra Singh Sekhawat hoin State Minister's Conference on Jal Jeevan Mission buatsaih a ni a, chief minister Zoramthanga pawh a tel.

Conference-ah hian CM Zoramthanga chuan, Mizoramin kum tin ruahtui tam tâwk tak a dawn ṭhin thu leh ruahtui dah khâwlna ṭha a tam tâwk loh avangin ṭhálah tui harsatna hmun tam takah a thlen ṭhin thu a sawi a, "Tui dahkhawlna ṭha tak a awm chuan he harsatna hi sutkian theih a beiseiawm," a ti.

Jal Jeevan Mission hi kumin Independence Day lawmnaah prime minister Narendra Modi chuan kalpui a nih tur thu a puang. He hmalakna hian tun leh hun lo kal zel tura mamawhna tur ngaihtuah tel chunga ṭangkai leh renchem taka tui hman leh lak dante a huam a, sorkar laipui leh state sorkar ṭangkawpa hmalakna tur a ni.

Mission hnuaiah hian India rama chhungkaw tinte chu kum 2024-ah chuan tui thianghlim hnianghnâr taka an hman tur pek vek tum a ni a, ruahtui tla a tam thei ang ber dah khâwl tura ruahman a ni.