MST bus-in a tum ber chu mipui tana veivahna tláwm leh him a ni - Transport Minister
Transport department officer-te chu nimin khan an directorate conference hall-ah an inhmu khawm a; an hun hmanpuitu, Transport minister TJ Lalnuntluanga chuan, tun aia nasa zawkin Mizoram mipui tan hna thawh an tum thu leh, MST bus service-in a tum ber chu mipui tana veivahna tláwm leh him a nih thu a sawi.
TJ Lalnuntluanga chuan, Transport department chuan ram mipui hmakhua leh an hamṭhatna tur ngaihtuahin, sum leh pai lama a hlâwk leh hlâwk loh lam ngaihtuah lutuk loin mipui rawng an báwl zel dawn tih a sawi a, "MST bus service hian a tum ber chu, mipui tana veivahna tláwm leh him a ni. Mimal sumdawng motor tlan duh lohna hmun leh khua thleng pawhin an tlân zel a, passenger tlêm leh tam lamah buai loin, hunbi ang thlap thlapin an tlân ṭhin," a ti.
Transport Minister chuan, an department chu mi tam takin sum hloh department anga an sawi fo ṭhin chu an hnathawh dik tak an hriat chian tâwk loh vang nia sawiin, "Sorkarin mipui tan, a bikin cancer vei, mitdel leh pianphunga rualbanlote leh HIV+ve te tan a thlawna chuan theihna turin ruahmanna a siamsak a ni," a ti a; hmeichhia kum 60 chin chung lam tan Mizoram chhungah a thlâwna an chuan theihna tur leh tu pawh kum 65 chin chung lam tan 50% fare concession siamsak a nih thu a sawi.
Department-in khualzin phur bus service lai 36 an neih mek thu sawiin, "Bus-te hi a hlui deuh tawh avangin bus thar leh changkang zawka thlak turin hmalak mek a ni. Khawvel ṭhang zelin a ken tel chu lirthei pung zel hi a ni a, Motor Vehicle Wing pawhin lirthei enkawlna dan hrang hrangte ṭha takin an kalpui thei leh sorkar sum báwma kum tin revenue an chhûng lut thei reng hi thil lawmawm tak a ni. Kum 2018-19 chhunga lirthei aṭanga chhiah an hmuh chu cheng nuai 4223.38 a ni," a ti.
Inhmuh khawmnaa tarlan danin, chhiah pe ṭha lote pawh an phurrit tihzângkhai nana ngaihdamna hun (grace period) kumin July leh August thla chhung an hawng a, grace period-ah hian nimin thleng khan Rs. 44,073,978 hmuh a ni tawh.