Two wheeler taxi intlân chhâwk turah Traffic police-in sticker pe chhuak ṭan
Coordination Committee on Traffic Management-in Aizawl khawpuia two wheeler taxi-te kawngpui tlangdung (main road)-a intlân chhâwk tura a ruahmanah Aizawl Two Wheelers Taxi Association (ATTA) leh Traffic SP-te an inbe rem a; September 2, 2019 aṭanga Aizawl main road-a intlân chhâwkna turah nimin khan taxi-te bel tur sticker pek chhuah ṭan a ni.
Traffic police ruahman dan chuan, Thawhṭanniah sticker 'A' bel two wheeler taxi-te Aizawl main road (main spine/artery)-ah an tlân thei dawn lo a; Thawhlehniah sticker 'B' bel, Nilainiah sticker 'C' bel, Ninganiah sticker 'D' bel leh Zirtawpniah sticker 'E' belte an tlân thei dawn lo. Tlangdung kawngpuia an tlân theih loh ní-ah hian veng chuanhnuai zawkahte erawh chuan an tlan thei ang.
Main road-ah hian Kulikawn aṭanga Bawngkawn inkar tlangdung kawngpui bakah, Temple Square leh Vaivakawn inkar a tel. Main road-a tlân theih loh nía tlân phal chin tur chu - chhuah lamah Bazar Bungkawn chhuah hmaa Modern HSS bul thleng te, tlâk lamah Vaivakawn aṭangin Chanmari kawngpui pawh hma deuh te a tel a; Vaivakawn leh Dinthar inkarah tlân theih a ni dawn.
Durtlang leh Zemabawk lamah Bawngkawn Presbyterian Kohhran biak-in thlanga traffic point hêlin an intlânpawh thei dawn a, Venghlui lamah Dak Inpui bulah chhuakin, Treasury Square bus stand-ah tlân thlain, Venghlui chhukthlaah tlan theih a ni ang. Inrinni, Pathianni leh sorkar chawlh ní-ahte erawh chuan an vaiin an tlân thei dawn a ni.