Kolasib DC leh Hailakandi DC-in Zophaiah hma thar lak loh an rêl

Kolasib DC Zoengsanga chuan, August 26, Thawhṭannia Hailakandi DC nen Bairabia an inbiaknaah, Bairabi Zophai hmunah state pahnihin hma thar lak loh ve ve ni se, tiin thu an dah tih a sawi.

Hailakandi DC nena an inbiak­naa an thurelte Kolasib DC chuan nimin khan thuthar thehdarhtute a hrilh a, "Tu ve ve mahin Zophai hmunah hian hma thar lak loh ni se tiin thu kan dah a, district pahnihte telna Coordination Committee din ni se kan ti," a ti.

Kolasib Bawrhsap sawi danin, meeting-ah hian, a khát tawkin Kolasib leh Hailakandi DC inbiak ṭhin ṭha an ti a, thla thum hnua inbe leh turin thu an dah. Mosolman-te'n Zophaia mosque an sak chungchangah chuan, state pahnih sorkar inbiak fel turin thu an dah a; inbiak fel a nih hma chuan mosque chu sak chhunzawm loh tura tih a ni.

Kolasib DC chuan, Mizoram mi ni lo, hnam dangte tan Mizorama awm turin Inner Line Permit (ILP) an neih ngei ngei a ngaih thu Hailakandi DC a hrilh tih sawiin, "Hailakandi DC chuan an lo inhrilh darh tur thu a sawi a ni," a ti.