Mizoram sorkarin ramri chungchangah Mizo mipuite min mualpho - ZPM Ṭhalai
Zoram Peoples' Movement (ZPM) party ṭhalaite chuan, Bairabi Zophaia Assam lam mite'n in leh mosque an sakna bul velah Assam police-te an duty laiin, Mizoram police duty hmuh tur an awm loh thu an tarlang a; "Mizoram sorkarin ramri chungchangah Mizo mipuite min mualpho a ni," an ti.
Nimina ZPM ṭhalai thuchhuah tarlan danin, ZPM ṭhalai chuan August 26, Thawhṭanni khan Zophai, Bairabi-a Mosolman biak-in (mosque) sakna hmun enfiah turin lamkal an intir a, a hmunah thil awm dan an enfiah. August 26 hi Kolasib DC leh Hailakandi DC ten inbiakna an neih ní leh mosque a hmuna an enho ní a ni.
ZPM ṭhalai chuan, Zophaia Mosolman mosque chu sak chhunzawm zel a ni tih an hmuh thu sawiin, "Hemi ní (August 26) pawh hian Mosolman biak-in satute'n a ban chhûng turin an buaipui mek a, in sakna hmanrua leh bungruate pawh hmuh tur a awm. Assam police leh Assam IR duty hmuh an ni a, Mizoram police-te chu duty tir an ni lo nge, hmuh tur an awm lo," an ti.
Mizoram Legislative Assembly pariatna session vawi thumnaah ramri buaina chungchanga C Lalsawivunga zawhna Home Minister-in a chhannaah, Assam nen ramri chungchangah buaina a awm a hriat loh thu a sawi tih tarlangin ZPM chuan, chumi hnu lawkah Vairengte dáiah cinema hall hlui Assam lamin an sak ṭhat avangin buaina a chhuak tih an sawi.
ZPM ṭhalaite chuan, "Political party-te'n sorkar chu ramri humhim nana hma la tura an nawr mek lai leh, MZP-te'n Assam nena ramri buai chhingfel tura sorkara an thu thlente tihhlawhtlin a nih loh avangin July 19, 2019-ah 'Ram chhan kawngzawh' an huaihawt tawh hnu pawha Assam police venhimna hnuaia Zophaia Mosolman biak-in sak chhunzawm zel a ni hi Mizoram sorkarin Mizoram mipuite min mualphonaah kan ngai a ni," an ti.
Zophai chu Assam leh Mizoram lamin kutthlak lo ve ve (status quo) tura dah a ni tih sawiin ZPM ṭhalaite chuan, "Mizote tham lo taka Assam lamin Zophaia kut an thlak fo mai hi Mizoram sorkar chak loh vangah kan ngai a, ramri venhimnaah nawr kal hleih theih loh MNF ministry kan nei hi vanduaithlak kan ti," an ti a; Mizoram chu ZPM-in kalphung thar hmanga an kaihhruai a ngai tak zet tawha an hriat thu an tarlang.