KṬP General Conference a ṭiak HIV/AIDS ven nana hmalak zel an rel
KṬP General Conference vawi 58-na, Leisekawt Field, Serchhipa February 27, 2020-a ṭan chu nizan khan a ṭiak. Inkhawmpui hian HIV/AIDS darh zau zel tur ven kawngah hmalak chhunzawm an rél.
KṬP General Conference-ah hian Inrinni khan nilengin Serchhip Kawnpui Kohhran biak-inah rorel inkhawm neih a ni a, Central KṬP leader Rev. Dr K Lallawmzuala'n a kaihruai. Rorel ṭan hmain Synod moderator Rev. R Lalchangliana kaihhruaiin kum 2020-2022 chhunga CKTP hruaitu tur mi 25 thlan a ni.
KṬP rorelnaah hian hmalakna kal mek, HIV/AIDS a darh zel loh nan hmalak chhunzawm zel an rel bakah, HIV/AIDS veite puala ṭawngṭai rual an rel. KṬP General Conference thlengtu puih nan sum thawh khawm rawtna pastor bial eng emaw zat aṭanga a luh angin, Thawhṭanni zana KṬP vawi khat inkhawm thawhlawm thawh an rél a ni.
Kum 2024-a General Conference neihna atan Ngopa khua an thlang a; kum 2021-22 kumpuan thupui tur chu 'Kristian chhungkua' tih a ni. KṬP rorel zingah - kum 2021-22 chhunga thupui zir turin 'Ram, khawtlang leh kohhrana ṭhalaite pawimawhna inzirtirna CKṬP-in buatsaih rawh se tih te, YRC puala member tina pawisa thawh chhunzawm te, General Conference leh Rorel Inkhawmah YRC puala báwm hûn dan ngaihtuah te, chhawmdawlna pual, Hospital Charity Fund leh YRC pualin KṬP zan khat inkhawm thawhlawm ṭheuh lak khawm te, ram pum huapin ruihhlo ngaite tan chaw ngheia ṭawngṭai te, VC/LC inthlan puala ṭawngṭai rualte a tel.
KṬP General Conference-ah hian Inrinni zan aṭangin speaker Rev. Lalrosiama'n thupui 'Felna hriamhrei' tih a sawi a; Inrinni zan inkhawm bànah Kristian Ṭhalai chanchinbu golden jubilee lawmna hun hman a ni. Nizan khan Synod Moderator-in Central KṬP hruaitu tharte hlanna hun a hmang.
Organising Committee tarlan danin, KṬP General Conference-ah hian palai 28,000 chuang an kal a, heng bakah hian nimin khan lehlanga kal ṭhahnem tak an awm. Nizan inkhawm bàna fellowship neih chu zanlai pelhah an zo a, KṬP General Conference vawi 58-na chu a ṭiak ta a ni. Palaite hian vawiinah an khua/veng ṭheuh an pan ang.