Kum 2019 chhungin Mizoramah ruihhlo vangin Mi 30-in nunna chân tawh
Excise & Narcotics department (END) chhinchhiah danin kum 2019 chhungin ruihhlo vangin mi 30-in nunna an chan tawh. Central YMA hnuaia ruihhlo do pawl, Supply Reduction Service (SRS) chhinchhiah danin, kumin chhunga Mizorama ruihhlo vanga thi zat chu mi 29 an ni thung.
END chhinchhiah dan chuan, kumin chhungin Mizoramah ruihhlo vangin mipa 22 leh hmeichhe pariat an thi tawh a, an vaiin mi 30 an ni. END hian kum 2018 chhung khan ruihhlo vanga thi zat mi 56 an chhinchhiah a, mipa 46 leh hmeichhia 10 an ni.
Vanglaini palai zawhna chhangin SRS convener Roneihthanga chuan, an chhinchhiah chinah ruihhlo vangin kumin chhungin Mizoramah mi 29 an thih tawh thu a sawi a, "Kan hriat chiah loh ruihhlo vanga thi an awm ngei kan ring," a ti.
Roneihthanga chuan, veng hrang hrangah ruihhlo ngai an tam thu sawiin, "Supply leh demand tihtlem lamah ṭan kan la a, ruihhlo hi kan ûm tawmim ṭan deuh tawh," a ti a, theihtawp chhuaha ruihhlo do hna an thawh thu a sawi.
SRS Convener sawi danin, Mizorama ruihhlo vanga thite'n an thihpui tam ber chu heroin a ni a, heroin ti ṭhinte chuan khuh damdawi an ti tel tlangpui.
Methamphetamine addict Mizoramah pahnih khat bak an awm hriat a ni lo a, methamphetamine man tur a awm ṭhin chhan ber chu, India ram chhung hmun danga thawn tur tawlh rûkna kalkawngah Mizoram an hman ṭhin vang niin SRS-te chuan an sawi.
SRS-te hian supply (ruihhlo tawlh leh zawrh) leh demand (ruihhlo ti ṭhin) tihtlem an duh avangin ruihhlo vanga an mante chu chhanchhuahna hmunah an dah deuh zel a, a tam tham an mansakte erawh chu Excise & Narcotics leh Police hnenah an hlan nghal thung a ni.