Sumdawng leh hna thawk anga insawi mahni inzuar ṭhin an awm - R Lalngheta

Central YMA vice pre­sident R Lalngheta, CYMA Kumpuan Com­mittee chair­man ni bawk chuan, thingtlang aṭanga Aizawla awm, chhungte bula sumdawng leh hna thawk anga insawi zingah mahni inzuar eng emaw zat an awm thu a sawi.

R Lalngheta hian nimin khan MHIP General Headquarters inthlana vote chhiar a nih laiin thu a sawi a, hmeichhiate'n ram leh khawtlang siamṭhatna kawngah mawhphurhna an nei tih an hriat a ngaih thu sawiin R Lalngheta chuan, "In hmeichhiatpui zingah ruihhlo vanga harsatna tâwk tam tak an awm. Hmeichhia ruihhlo ngaite chhanchhuah kawngah hmeichhiate'n mawh an phur ve tih in inhriat a pawimawh," a ti.

Kumpuan Committee Chairman chuan thingtlang aṭanga zirna chhunzawm tura khawpuia awm zingah an chhungte hriat loha nupa anga khawsa, ruihhlo vanga man tâwkte pawh an awm tih sawiin, "Sumdawng leh hna thawk anga an chhungte bula insawi si, mahni inzuar pawh tam tak an awm. Nu leh pate'n an fate an hriat chian a ngai a, siamṭhat theih a nih laia siamṭhat a pawimawh hle. Ram leh hnam, khawtlang a dam theih nan ṭan tlàn a ngai a ni," a ti.

R Lalngheta chuan eng pawl pawh inthlan a nihin ṭan a na vek tih sawiin, "Chak lo zawk nih pawhin lungawi thiam a ngai," a ti a, tute pawh tling se thawhhopui thiam turin MHIP member-te chu a chah.