Indian Forest Act siamṭhat tur chungchang Congress-in Chief Minister-ah an thlen

Mizoram Pradesh Congress Committee (MPCC) chuan, Indian Forest Act, 1927 Amendment Bill chungchanga an party ngaihdan te, Mizoram tana him lo lai leh siamṭhat ngai nia an hriatte chief minister Zoramthanga hnenah nimin khan an thlen.

MPCC tarlan danin, Indian Forest Act siamṭhat tumna zir chiang turin MPCC chuan mi pali awmna Study Group a din a; member-te chu convenor Lallianchhunga (MZU), Lalsawta (ex-minister), K Riachho (IAS Rtd.) leh RC Thanga (advocate) te an ni.

Study Group zir chianna aṭangin Mizoram tana him lo leh siamṭhat ngaite thur chhuakin memorandum an siam a, Mizoram sorkar bawhzui turin an convener Lallianchhunga hoin nimin khan Chief Minister hnenah an thehlut.

Congress party chuan, Indian Forest Act siamṭhat tum  dan chu Mizoram tan a him lo hlea an hriat thu sawiin, "Thingtlang loneitu tam takin nasa taka an tawrh theih bakah, forest officer, police officer leh revenue officer ten phalna la hmasa loa an duh duh man theihna an nei tur hi a him lo tak zet. Khawtlang thuneihna tam tak a bo dawn a, forest la nei ṭha Mizoram tan chuan dan hlauhawm tak a ni thei dawn," an ti.

MPCC chuan, Indian Forest Act, 1927 siamṭhat tum chung­changah sorkar laipui thurawn angin, pawl hrang hrang huapa inràwn khawmna a rang thei ang bera buatsaih turin sorkar an ngen a; na taka sorkar laipuiah rawtna thlen thuai turin Mizoram sorkar an phût bawk.