Sorkarin MBBS seat a chingfel thawkhat

Mizoram sorkar quota-a Bachelor of Medicine and Bachelor of Surgery (MBBS) zir turte chu Higher & Technical Education (HTE) department chuan an chingfel tawh a, Mizorama medical college awmchhun, Zoram Medical College (MIMER)-ah pawh MBBS zir thar turte'n admission an ti zo thawkhat tawh.

Central pool-ah Mizoramin MBBS seat a hmuh dawn leh hmuh dawn loh a chian hmain NEET 2019 paltlangtu Mizo zirlai tam tak chuan Mizoram state quota hmangin Zoram Medical College-ah admission an ti tawh a; zirlai ṭhenkhat, a bikin NEET-a Mizoram aṭanga rank sang zinga ṭhenkhat chuan central pool aṭanga seat beiseiin, ZMC an thlang nghal lo a ni.

Mahse, sorkar laipuiin August 16, 2019-a India hmarchhak state ṭhenkhat leh union territory-te hnena central pool-a MBBS seat pek zat a tihchhuahah, Mizoram chuan seat a nei ve ta lo a; hei vang hian central pool beisei zirlai 

ṭhenkhat chu an buai ta a ni. Central pool nghaktute chuan, HTE department hotute'n central pool hmuh ngei an inbeisei avangin NEC aṭanga seat hmuhte leh ZMC-a seat awmte thlang lo a, central pool seat nghak an nih thu Vanglaini palai an lo hrilh tawh.

Hemi chungchangah hian HTE Technical Wing-a hotute chuan Vanglaini palai zawhna chhángin, central pool-a seat beiseitu zirlaite chu HTE lamin an buaipui zui a, tunah chuan ZMC lamah lut turin an ti fel tawh a, chutih rualin, ZMC-a lut duh lo an awm ve bawk tih an sawi.

Tarlan tawh angin, NEET 2019-ah hian Mizoram aṭangin mi 595 an tling. Central pool nghâktute chu Mizoram chhung bik aṭanga an tih ṭhat dan anga chhûtin, Mizoramin central pool-ah seat nei se chuan chang ngei tura ngaihte an ni.

Hetih lai hian, ZMC hotute chuan, August 27, 2019 thleng khan MBBS first year zir thar turin zirlai 92-in admission an ti tawh a, seat pariat a la âwl tih Vanglaini an hrilh. ZMC hotute sawi danin, Mizorama medical college awmchhunah hian class tinah seat 100 a awm a, chu'ng zinga seat 70 chu Mizoram quota a ni a, all India quota atan seat 15 leh non-resident Indian (NRI)-te tan seat 15 zuah a ni.

August 27 tlai thleng khan Mizoram state quota aṭangin mi 69-in admission an ti tawh a, seat pakhat a la ruak. NRI quota seat 15 chu hnawhkhah a ni tawh a, all India quota atana seat zuah aṭangin zirlai pariatin admission ti tawhin, seat pasarih a la ruak. Mizoram state quota leh all India quota atana seat zuahah seat pariat a la ruak a ni.