KHAWTHLIR

Lirnghing a thlen palha chhanchhuah hna thawh dan a taka inzirtirna hun nimin khan Kawrthah Higher Secondary School-ah neih a ni. Mock drill hi Mamit District Disaster Management Authority aṭangin SDC Chinlianmanga, Disaster Management and Rehabilitation officer-in-charge hoa hman a ni a; Kawrthah khuaa SDO pisa, police station, damdawi-in leh Kawrthah HSS-te an tel a ni.

Aizawl South-II bialtu MLA Lalchhuanthanga chuan nimin khan a bial chhung Salem Venga lei minna hmun a tlawh a, hmalak zui dan tur a enfiah. MLA hian lei min zel tur ven nan silpauline leh hnatlangte ei leh in senso atan pawisa a pe a ni.

Mizoramah vawk natna Porcine Reproductive and Respiratory Syndrome (PRRS) a lêng nia hriat a nih avangin Siaha district Magistrate chuan Cr.PC 144 hmangin Siaha district chhungah district dang aṭanga vawk lak luh leh district danga vawk thawn chhuah a khap. Vawk damlo sêra hralh phal a nih loh thu leh, vawk thi reng reng uluk taka phûm tur a nih thu a puang bawk. Thupek hi thla hnih chhung awh tur a ni.

KVK Lunglei district, Hnahthial chuan August 24 aṭanga August 31 thleng an buatsaih tur Skill Training on Rural Youth Training Programme on Post Harvest Processing and Packaging of Fruits & Vegetables' hnuaiah Thawhlehni khan Leite leh Roltlang East ṭhalaite tan training an buatsaih. Training-ah hian thlai leh thei, a thar hun laia vawn ṭhat leh sawngbawl dante zir a ni.