Chawa intodelh hi sorkar tum leh ngaih pawimawh ber a ni - C Lalrinsanga

Agriculture minister C Lalrinsanga hoin Directorate of Agriculture Committee Room-ah Agriculture department officer-te an inhmu khawm a; Minister chuan, chawa intodelh chu sorkar tum leh ngaih pawimawh ber a nih thu a sawi.

C Lalrinsanga chuan, sorkarin Agriculture Development Board a din tawh thu sawiin, "Chawa intodelh chu sorkar tum leh ngaih pawimawh ber a ni a, ei leh bara kan intodelh theih nan chak taka hmalak tum a ni. Khawvel zau zawk thlirin, chemical fertilizer aiin organic fertilizer hman uar zawk tum a ni," a ti.

Agriculture Minister chuan, ṭhalai tam takin kut hnathawh an hreh loh theih nan farm mechanization uar a, khawl thâ hmanga buh leh bâl tam zawk thar chhuak tura hmalak a nih dawn thu a sawi a, "Buh leh bâl thar tam nan tui a pawimawh avangin Irrigation department nen inpawh taka thawhho a ṭul," a ti a; loneitute'n tam zawk an thar a, Mizoram chhunga state mipui mamawh khawp thar a nih theih nan theihtawp chhuah turin Agriculture officer-te a chah.

C Lalrinsanga chuan, tun aṭanga rei lo têah hian Pradhan Mantri Maan Dhan Yojana (PMMDY) chu Mizoramah hman theih beisei a nih thu sawiin, "PMMDY hnuaiah hian loneitu kum 18-40 inkarte tan pensionṭha tak pek a ni dawn a, kum upat lam an pan hnua tuamhlâwm an nih theih nan he pension scheme hi hman ṭangkai a ni dawn," a ti a; chutiang tur chuan farmer census leh farm land record mumal tak neih a nih dawn thu a sawi.

Agriculture (Research & Extension) director Dr H Saithantluanga sawi danin, kumin March thla khan bean chi thar 'Zorin Bean' an siam chhuak a, vaimim chi thar pasarih siam chhuak turin hma an la leh mek. Agriculture (RE) Directorate hian Hnahthialah Basic Agriculture Technology zirna Integrated Training Centre te, Neihbawihah State Pesticide Testing Laboratory leh Chemphaiah Agriculture Demonstration Farm an nei a; district tinah KVK, ATMA, SAMETI leh MOVCD an enkawl mek bawk.

Agriculture (Crop Husbandry) director Rohmingthanga Colney chuan, district thar pathumah DAO office hawn thuai tum a nih thu a sawi a; Mizoramah fall armyworm puang mah se, chhiatna nasa lutuk a thlen loh thu a sawi rualin, fall armyworm chu la lang zel thei a nih avangin inring renga awm a ṭul thu a sawi a ni.