DC-in NH-44A kawngpui zauh mek enfiah

Lengpui leh Mamit inkar NH-44A kawngpui zauh mek chu August 27, Thawhlehni khan Mamit DC Dr Lalrozama leh PWD hotu ṭhenkhatte'n an tlawh a, hna thawh mek dinhmun an enfiah. Kawng hi kumin chhunga chhunga zawh tura tih a ni.

Mamit Bawrhsap chuan, kawng zauhnaah harsatna awm­te sukiang tur leh chak zawka hna thawh a nih theih nan ṭan ho a pawimawh thu a sawi a; district thuneitu te, hna enkawltute leh khawtlang hruaitute chu an theihna zâwn ṭheuhah kawng siam a chak zawk theih nana ṭan la turin a sáwm.

PWD executive engineer Lalzawmthanga chuan, NH-44A zauh hna thawh mek chu Ministry of Road Transport & Highway (MoRTH)-in December 2019-ah zawh vek tura a tih thu sawiin, hun tiam chhunga zawh a nih theih nan theihtawp an chhuah a, kawng siamtu company pawh an nawr reng dawn thu a sawi a; hna thawh tur aṭanga 75% vel zawh a nih tawh thu a sawi bawk.

Lengpui-Mamit inkar NH-44A kawngpui siam hna thawh mekah hian kawng laih tlang loh km. 4 vel a la awm a; a hautak lai bera ngaih Dampui hnuai lung hmunah metre 250 vela thui laih tur a la awm a ni.