AMC inthlan tluang taka neih a ni MNF chak inring, INC leh ZPM inbeisei sang
Aizawl Municipal Corporation (AMC) inthlan vawi thumna chu nimin khan zawh a ni a, buaina leh harsatna lian tham a awm hriat a ni lo. Inthlanah hian vote awm zawng zawng aṭanga 63.62% a tla; vote tlate chu naktuk chawhma dar 10 aṭangin Pachhunga University College-ah chhiar a ni ang.
AMC inthlanpuiah hian zing dar 7-ah vote thlâk hun hawn a ni a, tlai dar 4 thleng vote thlâk tura ruahman ni mah se, chhan eng eng emaw avanga vote thlak zo hman lo, dar 4 pelh thlenga vote thlâkna polling station a awm nual. Dar 5:30 velah chuan vote thlakna an inkhâr kim thei nia thu dawn a ni.
State sorkara rorel lai MNF president Zoramthanga chuan AMC inthlanah hian sorkar siam tura an chak ngei an inrin thu a sawi a; MPCC president Lal Thanhawla leh ZPM leader Lalduhoma te chuan beiseina sang tak an neih thu an sawi bawk.
Vanglaini palai zawhna chhángin MNF President chuan, Pathian ṭanpuinaa sorkarna siam turin chak ngei an inbeisei thu a sawi a, "Tih ṭhat deuh phei chuan majority mai ni lo, seat 12-13 thleng lâk theih kan inbeisei. Sorkar lai kan nih bakah MP, LC/VC, LADC inthlanah tluang takin mipuiin min vote a, hei hian mipuiin MNF-ah rinna an la nghat tih a tilang niin a lang," a ti a; mi changkang leh mithiam awm khawm tam zualna Aizawlah chak ngei an inrin thu a sawi.
MNF-in an khin ber party zawhna chhángin Zoramthanga chuan, "BJP chuan chuh pawh an chuh kim lo a, thu dangah dah ila. ZPM leh Congress-ah huphurhawm zawk ka hrethiam lo, an intluk tâwkah ka ngai," a ti.
Mizoram Pradesh Congress Committee president Lal Thanhawla chuan, an party boruak a ṭhat thu Vanglaini palai zawhna chhángin a sawi a, "Kalna apiangah an hlim a, unit leh block an phûr tláng. Mahse, hei hi vote-ah a inlet vek ang em a hriat loh," a ti a, beiseina an neih sàn thu a sawi.
Lal Thanhawla chuan, candidate an neih ṭhat thu sawiin, "Kan block leh unit-te an thawk rim a, kan candidate tam zawk hi kan party-a kan lawm luh chawp, mi thar an ni a, ka la hmelhriat ngai mang lohte an ni. An vengah mi ṭha tak tak, khawtlang tana mi ṭangkai tak tak an ni. Kan candidate-te hi kan worker-te pawhin beisei an neihna chhan a ni a, mipui boruak chu thu dang," a ti.
Thuthar thehdarhtute zawhna chhángin ZPM leader Lalduhoma chuan, tun ṭuma AMC inthlan chu an party tan danglamna bik riau a awma an hriat thu a sawi a, "Kan candidate zawng zawng deuh thaw hi mi thar, politics tui nû la dái ngai lo, party ruihchilhna thlarauin a la bual ât ngai loh an ni a, kan campaigner-te pawh an ni tho. Kumin tluka hmél thar hmuh tam kum a la awm lo," tiin, mi ṭhate'n khawpui leh ram siamna lam an vei thara a hriat thu a sawi.
Lalduhoma chuan, politics-a mi thar, mi ṭha leh khawtlang tana mi ṭangkai tak tak an feh chhuak dûl dûl nia sawiin, "Politics-ah harh tharna kan chang a ni ber. Kan party hi kan thawk rim ber a, kan phûr em em. Beiseina kan nei sang a, kan hlim hle. Beiseina sang kan nei a ni," a ti.