KHAWTHLIR

Excise & Narcotics department (END) leh Assam Rifles-te ṭang dun chuan nimin khan Zokhawtharah heroin gram 68.6 an man a, a neitua puh Vanlalngheta (41) s/o Vanhnuaithanga, Khawmawi, Myanmar an man tel. Heroin hi tualchhunga hralhna angin Rs. 27,32,000 man a ni. END leh AR-te hian February 15, Thawhṭanni khan Zokhawtharah vêk heroin gram 237.5,  Rs. 95,00,000 hù an man tawh bawk a, a neitua puh R Lalrinkhuma (35) s/o R Thankunga Champhai Bethel Venga khawsa mek nia insawi an man bawk.

Election Commission of India thu angin, Meghalaya-a by-election-a hman turin Kolasib-a M3 EVM/VVPAT 30 chu hmantir a ni dawn a, Kolasib District Election Officer (DEO) kaihhruaiin vawiin zing 6:30 aṭangin lâk chhuah a ni ang.

Peoples' Conference (PC) party chuan thuchhuah siamin, State Election Commission (SEC)-in hripui léng karah Aizawl Municipal Corporation inthlan an buatsaih thei chu lawmawm an tih thu an tarlang. Inthlan buaipuitute inpekna leh thawhrimna te, dan leh thupek kengkawhtute leh Mizoram Peoples' Forum (MPF)-te ṭhahnemngaihna fakawm an tih thu an sawi bawk.

State Referral Hospital-ah nimin khan Covid-19 vei dah luh an awm lo a, mi pakhat chhuahtir a ni thung a, mi pathum enkawl mek an ni. SRH-ZMC Bulletin tarlan danin, mi pathum zinga pakhat chu ICU-ah pakhat awmin, ventilator nen enkawl mek a ni a, Isolation ward-a awm mi pahnihte'n harsatna lian tham an nei rih lo. Nimin khan AMC inthlan ni a nih avangin ZMC laboratory-ah swab sample endik a ni lo.

Zofa Global Network chuan thuchhuah siamin, Myanmar sipaite'n an ram sorkar rorelna an páwnglâk chu an dem tak zet tih an tarlang a, "Myanmar rama kan unau Zo fate (Chin-Mizo-Kuki-Zomi) kiangah nghet takin kan ding reng a ni. Myanmar ramah democracy puitling a awm leh thuai kan phût tlat a ni," an ti.