COVID-19: Mizoram dinhmun Hripui vei mi 3 hmuh belh a ni

February 15, Thawhṭanni khan Mizoramah Covid-19 vei mi pathum hmuh chhuah a ni a, tualchhunga kái, hri an kàina hriat loh vek an ni. Nimin khan hripui laka fihlîm tawh mi pakhat chhuahtir a ni thung.

Covid-19 vei hmuh thar mi pathumte chu TrueNAT PCR hmanga hmuh pakhat leh RAT hmanga hmuh mi pahnih an ni a; ZMC laboratory-a swab sample endik zingah hripui vei hmuh chhuah a ni lo.

Hripui laka fihlîm tawh enkawlna hmun aṭanga nimina chhuahtir chu SRH-ZMC-a enkawl lai, mipa kum 22 mi a ni. 

Mizoramah Covid-19 vei mi 4,395 hmuh chhuah a ni tawh a, mipa 3,215 leh hmeichhia 1,180 an ni. Nimin tlai dar 5 thleng khan mi 4,368 (99.39%) chhuahtir an ni tawh a, mi 10 (0.23%) thi tawhin, enkawl mek mi 17 (0.38%) an awm. 

Thawhṭanni khan ZMC laboratory-ah swab sample 103, TrueNAT-PCR hmangin district parukah sample 86 leh RAT hmangin district 11-ah sample 945 endik a ni a; sample endik zawng zawng chu 1,134 niin, chu'ng aṭanga Covid-19 positive hmuh chhuah pathum chu 0.26% a ni.

February 15, 2021 thlenga Mizorama swab sample endik tawh zat chu 2,21,744 a ni a, chu'ng aṭanga Covid-19 positive mi 4,395 chu 1.98% a ni. Hripui vei hmuh tawh zinga mi 2,084 chu Mizoram chhunga kái an ni a, mi 2,311 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district pasarih - Siaha, Kolasib, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. District pali - Aizawl (13), Lunglei (2), Champhai (1) leh Lawngtlai (4) district-ahte chiah hripui vei an awm rih a ni.

Champhai Vengthar - 1: Mipa kum 20, hostel luh dawn vanga sample endik, hri kàina hriat loh, symptom nei lo.

Bungkawn - 1: Hmeichhia kum 32, nau pâi, nau neih dawn vanga private hospital-a endik leh hmuh chhuah, hri kàina hriat loh, symptom nei lo.

Lawngtlai-III - 1: Hmeichhia kum 17, hostel luh dawn vanga sample endik, hri kàina hriat loh, symptom nei lo.