February 22 aṭangin dan pangngaiin H/S chin chung lam hawn ṭan theih

Mizoram sorkar chuan February 22, 2021 aṭangin high school chin chung lamte sikul luh a phalsak vek tawh dawn a, college-te pawh February thla aṭangin college-a zirna ṭan phalsak an ni bawk.

Disaster Management & Rehabilitation (DMR) department chuan February 15, Thawhṭanni khan thupek a chhuah a, January 16, 2021-a thupek chhuah tawha inkaihhruaina ṭhenkhat chu tihdanglam a ni.

Sorkar thupek thara a lan danin, pawl 9 leh pawl 11 zirlaite chu February 22, Thawhṭanni aṭangin dan pangngai angin sikul an kái ṭan thei dawn a, hei hian hostel-a lut turte pawh a huam. Sikul kái turte chu sikulah infrared thermometer hmanga endik vek zel tur a ni a, hostel-a lut turte chu Covid-19 vei an ni lo tih finfiahna darkar 96 aia rei loa lâk nei ngei tura tih an ni thung. Hei bakah hian, School Education department-in ruahmanna leh inkaihhruaina a siamte zawm tura tih a ni bawk.

Mizoram sorkar chuan, College leh university zirlaite chu February 2021 aṭangin zirna ṭan a phalsak a, hei hian hostel-a awmte pawh a huam. Chutih rualin, Higher & Technical Education department-in university leh college-te chu inpuahchahna leh ruahmannate an endika an pawmpui phawt a ngai.

University leh college-te dan pangngaia zirna ṭan tur hian HTE department-in inang tlánga hman tur inkaihhruaina a siam ang a, chu chu Health & Family Welfare departrnent leh DMR department-te'n an pawmpui a ngai dawn a ni.

Zirna-in dang (training/skill training/coaching/vocational institution)-te pawh hawn phal a ni a, mahse, pindan pakhatah mihring leng zat chanve (50%) aia tam ṭum khatah awm/ṭhut phal a ni lo. Anni tana inkaihhruaina hman tur chu HTE department-in a ruahman ang.

Mizoram páwn, India ram chhung hmun dang aṭanga rawn lut turte chu ramri (entry point)-a screening point-ah enfiah zel tur a ni a, entry point an thlen hma darkar 96 chhunga swab sample test-a negative-te chu Mizoramah sample endik a ngai lo a, khung hran pawh a ngai tawh lo. Swab test negative tih finfiahna nei lote erawh chu Rapid Antigen Test (RAT) hmanga endik zel tur a ni thung a; negative-te tan inkhung hran a ngai tawh lo.

India ram pawn aṭanga rawn lut turte tana kaihhruainaa 'Europe'' tih chu 'Covid-l9 UK variant lênna ram' tia thlâk a ni a; chu'ng ram aṭanga Mizorama lutte chu khung hran ngei tur an nih rualin, Mizoram an thlen hmaa India ram chhunga ni 10 aia tlem lo awm tawhte leh swab test-a negative certificate neite chu khung hran loh tur a ni. India rama ni 10 la awm tling lote chu swab test-ah negative mah se, khung hran tur an ni.