ZMC-a zirlai tharte'n thutiam an chham

Zoram Medical College (ZMC) chuan academic session kal meka Bachelor of Medicine and Bachelor of Surgery (MBBS) zir thar turte chu zirna an ṭanpui tawh a; February 15, Thawhṭanni khan zirlai lut tharte'n anatomy cadaver oath (thutiam) an chham.

ZMC hotute hnen aṭanga thu dawn danin, academic session 2020-21-a MBBS first year zir turte tan November 11, 2020 aṭanga January 15, 2021 inkarah admission tih ṭhin a ni a, kum dangah chuan August-September thla chhung hawn a ni ṭhin. Kum 2020-21 atan erawh chuan Covid-19 leng avangin tikhawtlai a ni a; National Medical Commission thuchhuak angin February 1, 2021-ah zirna ṭan a ni.

ZMC-ah hian hripui léng avangin fimkhur takin admission kalpui a ni a, zirlaite chu hostel-a awm tur an nih avangin Mizoram páwn aṭanga zirlai kalte chu Lengpui Airport aṭangin ZMC bus-in hruai niin, ni 10 chhung khung hran an ni.

Hostel-a lut tur zirlai, state pawn aṭanga kal leh state chhunga mite chu RT-PCR hmangin swab sample endiksak vek an ni. Seat awm zat 100 chu hnawhkhah vek a ni a, state páwn aṭangin zirlai 16 an awm.

MBBS zir thar turte chu February 1-6, 2021 chhungin foundation course neihpui an ni a; chutah chuan inlawm luhna te, college dan leh kalphung inzirtirna te, an zirna kawnga pawimawh tur inhrilhna hunte an hmang. February 8-ah zirna pangngai ṭan a ni.

Zirlai tharte chu February 15 khan anatomy cadaver oath chhamtir an ni a; anatomy (mihring taksa kalphung) zir nan mihring ruang (cadaver) zai ṭhin a nih avangin, zirlaite'n cadaver an zai theih hmain cadaver oath an chham a ngai. Cadaver oath-ah hian mihring ruang an zai chu zah takin an zai tur a ni tih te, an inpekna avang chauha zir thei an nih angin, inpekna chu lawm takin an hnathawhnaa entawn reng turtein an intiam ṭhin.

ZMC-ah hian MBBS zir tur kum tin mi 100 lak thar ṭhin a ni a; kum 2018 leh 2019-ah zirlai 200 lak tawh niin, chu'ng zingah chuan state páwn aṭanga kal mi 43 an tel. ZMC batch thumnaa zirlai 100 lak lehte nen zirlai 300 lâk an ni tawh a ni.