AMC-in kum ruk chhungin Cheng vbc. 226.56 a dawng

Kum 2015-2020 chhunga Aizawl Municipal Corporation (AMC) sorkar chuan kum 2015-16 aṭanga 2020-21 chhungin sorkar laipuia Finance Commission leh Mizoram state sorkar aṭangin Rs. 2,26,56,48,597  (vbc. 226.56) an dawng. Sorkar kum kal mek (2020-21)-ah November 2020 thleng khan state sorkar aṭangin AMC leh local council-te hlawh tur Rs. 3,16,24,597 an dawng tawh bawk.

Vanglaini palaiin a kawmnaah AMC-a thawkte chuan, kum ruk chhunga an sum dawn zingah state sorkar aṭanga kum danga an dawn ṭhin, thawktute hlawh tur ni lo (non- salary) chu Mizoram sorkarin kum 2020-21 atan a la pe rih lo a, a dang chu an dawng vek tawh tih an sawi.

AMC hotute sawi danin, AMC leh LC-te hlawh tur bik April-November 2020 chhunga an dawn chu Rs. 3,16,24,597 a ni. State sorkarin nikum April-November chhung khan thla tin AMC hlawh atan Rs. 32,93,000 leh LC-te hlawh atan thla tin Rs. 7,01,000 zelin a pe. AMC leh LC-te hlawh belhkhawm chu thla khatah Rs. 39,94,000 zel a ni a, April-November 2020 chhunga AMC leh LC-te hlawh chu Rs. 3,16,24,597 a ni.

AMC hian sorkar laipuia 14th Finance Commission (2015-16 - 2019-20) chhungin Rs. 1,30,13,91,000 (vbc. 130.13) an dawng. 15th Finance Commission (2020-21 - 2025-26) aṭangin sorkar kum kal lai 2020-21-ah ṭum hnih pawisa an dawng tawh a, chu chu Rs. 22,50,00,000 (vbc. 22.50) a ni.

15th Finance Commission aṭanga AMC-in sum an dawn tawh chu tied fund leh untied fund a ni a; kum ruk chhunga sorkar laipui aṭanga an dawn bik chu Finance Commission 14-na leh 15-naah Rs. 1,52,63,91,000 (vbc. 152.63) a tling.

State sorkar aṭanga AMC-in a dawn (state tax devolution/share of state taxes) chu kum 2015-16 aṭanga kum kal lai 2020-21 (kum ruk) chhungin Rs. 73,92,57,597 (vbc. 73.92) a ni bawk.

Heti hian kum ruk chhunga AMC-in sorkar laipui leh Mizoram sorkar aṭanga sum a dawn tawh zawng zawng chu Rs. 2,26,56,48,597 (vbc. 226.56) a ni a; hei hi central aṭanga dawn vbc. 152.63 leh state sorkar aṭanga dawn vbc. 73.92 belhkhawm a ni.

AMC hian sorkar kum kal lai, 2020-21 bikah Mizoram sorkar aṭangin LC-te lawmman tur April-November 2020 chhungin Rs. 56,08,000 an dawng tawh a, thla khatah Rs. 7,01,000 zel an dawng.

April-November 2020 chhung thoin AMC-a thawkte hlawh tur Rs. 2,60,16,597 an dawng a, thla tin Rs. 32,93,000 zelin an dawng ṭhin. Hlawh atana Mizoram sorkar aṭanga an dawn zawng zawng chu Rs. 3,16,24,597 a ni.

Central Finance Commission leh Mizoram sorkar aṭanga sum a dawn tur pangngai a dawn bakah hian, AMC chuan hmun dang aṭanga sum hmuhna neuh neuh a nei bawk.